3DNews-ის ცნობით, 2024 წლის სექტემბერში Snap-ი და Meta ემზადებიან თავიანთი ახალი გაძლიერებული რეალობის (AR) სათვალეების წარსადგენად, რაც, სავარაუდოდ, AR ტექნოლოგიის განვითარებაში მნიშვნელოვან ეტაპს წარმოადგენს .
Snap-ი თავისი Spectacles AR სათვალეების მეხუთე თაობას 17 სექტემბერს, ლოს-ანჯელესში, პარტნიორთა სამიტზე წარადგენს. ეს სათვალეები მომხმარებლებს გაუმჯობესებულ ხედვის არეალს და ბატარეის უფრო ხანგრძლივ მუშაობას შესთავაზებს. ახალი მოდელი შეინარჩუნებს წინა ვერსიის დიზაინს, რომელიც 2021 წელს გამოვიდა, თუმცა მნიშვნელოვანი გაუმჯობესებებით. მაგალითად, Spectacles-ის პირველ თაობას შეზღუდული ხედვის არე ჰქონდა - 26.3° და ბატარეის ხანგრძლივობა მხოლოდ 30 წუთი. ახალი თაობის მიზანია ამ ნაკლოვანებების გამოსწორება.
თავის მხრივ, Meta 25 სექტემბერს Connect კონფერენციაზე AR სათვალის საკუთარ ვერსიას, კოდური სახელწოდებით Orion, წარადგენს. წყაროების ცნობით, Meta ფართო ხედვის არეალის წყალობით „მაღალი დონის ჩაძირვის“ მქონე მოწყობილობებს გვპირდება. ახალი Meta სათვალე, სავარაუდოდ, მაღალი ვიზუალური სიზუსტისა და ბატარეის ხანგრძლივობის მხარდაჭერას უზრუნველყოფს, თუმცა ზუსტი მახასიათებლები გაურკვეველი რჩება. უცნობია, ახალი მოწყობილობები წარმოდგენილი იქნება თუ არა Ray-Ban-თან თანამშრომლობის გაგრძელებად, თუ Meta-ს საკუთარი ბრენდის ქვეშ, VR ყურსასმენების Quest ხაზის მსგავსად.
ორივე კომპანიის მიზანია, AR სათვალე ყოველდღიური ცხოვრების განუყოფელ ნაწილად აქციოს, სმარტფონების მსგავსად, თუმცა მასობრივ წარმოებამდე და კომერციულ წარმატებამდე ჯერ კიდევ დიდი გზაა გასავლელი. მოწყობილობები, რომელთა პრეზენტაციაც სექტემბერში გაიმართება, სავარაუდოდ, მხოლოდ აპლიკაციების შემქმნელებისთვის იქნება ხელმისაწვდომი, რაც მათ საშუალებას მისცემს, ექსპერიმენტები ჩაატარონ და ახალი ფუნქციები გამოსცადონ მასობრივ ბაზარზე გასვლამდე.
კომპაქტური და ფუნქციონალური AR სათვალეების შექმნა, რომლებიც შესაძლებლობებით შედარებადი იქნება თანამედროვე MR მოწყობილობებთან, როგორიცაა Vision Pro და Quest 3, კვლავ გამოწვევად რჩება. საუკეთესო მოწყობილობებიც კი, როგორიცაა Magic Leap 2, მაინც მოცულობითია. ამის მიუხედავად, Snap-ისა და Meta-ს პრეზენტაციები, სავარაუდოდ, მნიშვნელოვან ყურადღებას მიიპყრობს როგორც დეველოპერების, ასევე მომხმარებლების მხრიდან, რაც სექტემბრის ღონისძიებებს AR ტექნოლოგიების განვითარების მნიშვნელოვან ეტაპად აქცევს.
