„როიტერის“ ცნობით, ალტმანის OpenAl-დან გათავისუფლებამდე დირექტორთა საბჭომ მიიღო წერილი, რომელშიც ხელოვნური ინტელექტის სფეროში მიღწეული გარღვევის შესახებ იყო საუბარი. შესაძლოა, წერილი Q* სახელწოდების პროექტს ეხებოდა, რომლის ფარგლებშიც მარტივი მათემატიკური ამოცანების ამოხსნა ისწავლეს.
„როიტერი“ საკითხთან დაკავშირებულ ორ წყაროზე დაყრდნობით იტყობინება, რომ „ოპენაინ-ეი-ის“ აღმასრულებელი დირექტორის თანამდებობიდან სემ ალტმანის გადადგომის წინა დღეს, კომპანიის რამდენიმე სრულ განაკვეთზე დასაქმებულმა მკვლევარმა დირექტორთა საბჭოს წერილი გაუგზავნა, რომელშიც ხელოვნური ინტელექტის (AI) სფეროში მომხდარი მნიშვნელოვანი აღმოჩენის შესახებ აფრთხილებდნენ, რამაც შესაძლოა კაცობრიობას საფრთხე შეუქმნას.
მათი თქმით, ეს წერილი დირექტორთა საბჭოს მიერ ალტმანის წინააღმდეგ შეტანილი საჩივრების გრძელ სიაში „ბოლო წვეთი“ იყო, რამაც საბოლოოდ მისი გათავისუფლება გამოიწვია. სააგენტოს ერთ-ერთმა წყარომ დააზუსტა, რომ აღმასრულებელმა დირექტორმა მირა მურატიმ თანამშრომლებს ახსენა პროექტი სახელწოდებით Q* (წარმოითქმის Q-Star), რომელიც, სავარაუდოდ, წერილის საგანი იყო.
კიდევ ერთი წყაროს ცნობით, Q* პროექტი შესაძლოა გარღვევა იყოს სუპერინტელექტის, ასევე ხელოვნური ზოგადი ინტელექტის (AGI) ძიებაში. მისი თქმით, Q*-ს უზარმაზარი გამოთვლითი რესურსები აქვს და უკვე შეუძლია სკოლის მათემატიკის ამოცანების გადაჭრა.
OpenAI-ის დირექტორთა საბჭომ ალტმანი 17 ნოემბერს გაათავისუფლა. გადაწყვეტილება ახსნილი იყო აღმასრულებელი დირექტორის „საბჭოსთან კომუნიკაციის გამჭვირვალობის უუნარობით, რაც ზღუდავს მის შესაძლებლობას, შეასრულოს თავისი მოვალეობები“. „საბჭოს აღარ აქვს ნდობა მის უნარში, უხელმძღვანელოს OpenAI-ს“, - ნათქვამია განცხადებაში.
„ბლუმბერგის“ ცნობით, ალტმანი საბჭოს წევრებთან, განსაკუთრებით კომპანიის თანადამფუძნებელთან და მთავარ სამეცნიერო ხელმძღვანელთან, ილია სუცკევერთან, კონფლიქტში იყო. უთანხმოება, სხვა საკითხებთან ერთად, გენერაციული ხელოვნური ინტელექტის განვითარების ტემპს, პროდუქტების კომერციალიზაციის მეთოდებსა და საზოგადოებისთვის მათი პოტენციური ზიანის შესამცირებლად საჭირო ზომებს ეხებოდა.
