ხელოვნური ინტელექტის სტარტაპმა Perplexity-მ სენსაციური შეთავაზება გააკეთა Google-ის Chrome ბრაუზერის 34,5 მილიარდ დოლარად შესაძენად, იტყობინება Financial Times.
ეს თანხა თითქმის ორჯერ აღემატება Perplexity-ის საკუთარი საბაზრო შეფასების 18 მილიარდ დოლარს.
კომპანიამ ხაზგასმით აღნიშნა, რომ გარიგების დასაფინანსებლად მზადაა რამდენიმე მსხვილი ვენჩურული კაპიტალის ფონდი. წინადადება Google-ის წინააღმდეგ ანტიმონოპოლიური საქმის ფონზე გაკეთდა, რომელშიც აშშ-ის იუსტიციის დეპარტამენტი მკაცრი ზომების მიღებას მოითხოვს, მათ შორის Chrome ბრაუზერის გაყიდვას.
Perplexity-ის თანადამფუძნებელმა არავინდ სრინივასმა Alphabet-ის აღმასრულებელი დირექტორის, სუნდარ პიჩაისადმი გაგზავნილ წერილში განაცხადა: „ეს წინადადება ანტიმონოპოლიური მოთხოვნების დაკმაყოფილებას ისახავს მიზნად... Chrome-ის კომპეტენტური და დამოუკიდებელი ოპერატორისთვის გადაცემით“.
Alphabet-მა კომენტარის გაკეთებაზე უარი თქვა. Financial Times-ის წყაროებმა განმარტეს, რომ კომპანიაში შეთავაზებას სერიოზულად არ აღიქვამენ და მას უფრო Perplexity-ის PR ხრიკად მიიჩნევენ.
აღსანიშნავია, რომ ეს არ არის სტარტაპის პირველი გახმაურებული მცდელობა, თავი დაემკვიდრებინა გიგანტების შესყიდვების გზით. წელს Perplexity-მ გამოთქვა სურვილი, 50 მილიარდ დოლარად შეეძინა TikTok, თუმცა ეს ინიციატივა უშედეგო აღმოჩნდა.
