ახალი მოდელი აღჭურვილია ოთხი ელექტროძრავით — თითო თითოეული ბორბლისთვის. ჰიპერქარის საერთო სიმძლავრე 1,903 ცხენის ძალაა.
Jaguar-მა წარმოადგინა Vision Gran Turismo SV სუპერმანქანა, რომელიც სპეციალურად Gran Turismo-ს სარბოლო სიმულატორისთვის შეიქმნა. Autocar-ის ცნობით, სხვა მრავალი ავტომწარმოებლისგან განსხვავებით, კომპანიამ ვირტუალური მოდელის გარდა, ავტომობილის რეალური მაკეტიც შექმნა. თუმცა, ბრიტანულ კომპანიას ჯერ არ აქვს ამ ავტომობილის წარმოებაში გამოშვების გეგმები. თუმცა, შესაძლოა, ბრენდის მომავალ ელექტრომობილებზე ზოგიერთი სტილისტური მინიშნება და ტექნოლოგია იქნას გამოყენებული.
„ტრასაზე და გზაზე მოძრავ „იაგუარებს“ ყოველთვის ერთი და იგივე დნმ ჰქონდათ. ეს ახალი მანქანა შექმნილია იმის დემონსტრირებისთვის, თუ რა არის შესაძლებელი, როდესაც რეალური სამყაროს ავტომობილების დიზაინის განმსაზღვრელი ტრადიციული საზღვრები მთლიანად მოიხსნება“, - განაცხადა „იაგუარის“ დიზაინის დირექტორმა ჯულიან ტომსონმა.
მისი თქმით, ჰიპერმანქანის გარეგნობა ბრენდის მრავალი მოდელის მახასიათებლებს იზიარებს, მათ შორის C-Type-ის, D-Type-ის, XJR-9-ის და XJR-14-ის. ტომსონმა ხაზგასმით აღნიშნა, რომ ახალი მანქანის დიზაინი „წარსულით არის შთაგონებული, მაგრამ უშიშრად მომავლისკენ იყურება“. მოთამაშეებს Vision Gran Turismo SV-ის გამოცდა მომავალ წელს შეეძლებათ.
ავტომობილის სიგრძე 5,540 მმ-ია, რაც Rolls-Royce Ghost-ის მსგავსია. ჰიპერქარის სიმაღლე ერთ მეტრზე ოდნავ მეტია. ბორბლებს შორის ბაზა 2,721 მმ-ია. ავტომობილის კორპუსი კომპოზიტური მასალებისგან არის დამზადებული. ახალ მოდელს აქვს ვიწრო ფარები, დიფუზორი, XJR-14-ის სტილში გასაშლელი უკანა ფრთა და გამყოფი. ინტერიერის ფოტოები ჯერ არ გამოქვეყნებულა.
ახალი მოდელი აღჭურვილია ოთხი ელექტროძრავით — თითო თითოეული ბორბლისთვის. ჰიპერმანქანის საერთო სიმძლავრე 1,903 ცხენის ძალაა. ის 0-დან 100 კმ/სთ-მდე აჩქარებს 1.65 წამში. მისი მაქსიმალური სიჩქარე 410 კმ/სთ-ია.
ეს Jaguar-ის მეორე მოდელია, რომელიც Gran Turismo-ს სარბოლო სიმულატორში გამოჩნდა. გასულ წელს ბრიტანულმა კომპანიამ Vision Gran Turismo-ს ვირტუალური სუპერქარი წარადგინა. ვიდეო თამაშის მოდელი სამი ელექტროძრავითაა აღჭურვილი - ერთი წინა ღერძზე და ორი უკანაზე. კომბინირებული აგრეგატები 1020 ცხენის ძალას და 1200 ნმ ბრუნვის მომენტს გამოიმუშავებენ. სუპერქარს 0-დან 100 კმ/სთ-მდე ორ წამზე ნაკლებ დროში აჩქარება შეუძლია, ხოლო მისი მაქსიმალური სიჩქარე 320 კმ/სთ-ს აღემატება.
