2022 წლის მსოფლიო ვირტუალური რეალობის ინდუსტრიის გამოფენაზე, Huawei-მ თავისი ახალი ჭკვიანი სათვალე, Huawei Vision Glass, წარადგინა.
მოწყობილობას აქვს MicroOLED დისპლეი FullHD გარჩევადობით თითოეულ თვალზე და 480 cd/m² სიკაშკაშით. კომპანიის თქმით, ის ფარავს DCI-P3 ფერთა სივრცის 90%-ს. გარდა ამისა, მას სერტიფიცირებული აქვს გერმანული ორგანიზაცია TUV Rheinland-ის მიერ მავნე ლურჯი სინათლისგან დაცვის მაღალი დონისთვის.
გავრცელებული ინფორმაციით, სათვალის გამოყენებით, მომხმარებელი 140 დიუმიანი პანელის ანალოგზე წვდომას იღებს.
საინტერესოა, რომ სათვალეს დამოუკიდებლად მუშაობა არ შეუძლია — მას სმარტფონთან ან სხვა მოწყობილობასთან კავშირი სჭირდება. არსებითად, მოწყობილობა სმარტფონების, პლანშეტების ან კომპიუტერების დამატებითი ეკრანის ფუნქციას ასრულებს.
Huawei Vision Glass-ის გაყიდვაში გამოსვლა 2022 წლის დეკემბერშია დაგეგმილი. ფასები და სხვა დეტალები ამ თარიღთან ახლოს გახდება ცნობილი.
