„Colossal Biosciences“-მა გენმოდიფიცირებული მგლის ლეკვების შექმნის შესახებ განაცხადა, რომლებსაც ისინი გადაშენებული საშინელი მგლის ფენოტიპურ და ეკოლოგიურ ანალოგებად აღწერენ.
საშინელი მგლები (Aenocyon dirus) პლეისტოცენისა და ჰოლოცენის პერიოდში ჩრდილოეთ და სამხრეთ ამერიკაში ბინადრობდნენ, მაგრამ დაახლოებით ათი ათასი წლის წინ გადაშენდნენ. ახლა, Colossal აცხადებს, რომ ეს ლეგენდარული მტაცებლები „გააცოცხლა“.
კომპანიამ CRISPR/Cas9 ტექნოლოგიის გამოყენებით ნორმალური მგლის ლეკვების 14 გენში 20 რეგიონი შეცვალა და სამი ლეკვი გამოუშვა: რომულუსი, რემუსი და ხალისი. ლეკვები 2024 წლის ოქტომბერში და 2025 წლის იანვარში შინაური ძაღლის სუროგატი დედებისგან დაიბადნენ. ლეკვები ამჟამად შეერთებული შტატების დაცულ ტერიტორიაზე ცხოვრობენ. გრანდიოზული მტკიცებების მიუხედავად, გაურკვეველი რჩება, შეიძლება თუ არა ამ მგლის ლეკვების გადაშენებული სახეობის ნამდვილ ანალოგებად ჩათვლა, რადგან Colossal-მა თავისი შედეგები რეცენზირებულ სამეცნიერო ჟურნალებში არ გამოაქვეყნა.
საშინელი მგლის გაცოცხლება კომპანიის პირველი ამბიციური მიზანი არ არის. Colossal-მა, რომელიც 2021 წელს გენეტიკოს ჯორჯ ჩერჩმა და მეწარმე ბენ ლამმა დააარსეს, უკვე გამოაცხადა პროექტები, რომლებიც ბეწვიანი მამონტის, დოდოს და თილაცინის ანალოგების შექმნას ისახავს მიზნად. 2025 წლის მარტში კომპანიამ წარმოადგინა გენმოდიფიცირებული თაგვები, რომელთა ბეწვი მამონტის ბეწვს წააგავდა. ეს ექსპერიმენტები მიზნად ისახავს ერთდროულად რამდენიმე გენის რედაქტირების ტექნოლოგიების შემუშავებას.
სკეპტიკოსები თვლიან, რომ კომპანია თავის წარმატებებს გაზვიადებს. ზოგიერთი მკვლევარი აღნიშნავს, რომ საშინელი მგლები გენეტიკურად არ არიან დაკავშირებული თანამედროვე ნაცრისფერ მგლებთან, რადგან ისინი წარმოადგენდნენ ცალკე ევოლუციურ შტოს, რომელიც 5.7 მილიონი წლის წინ განსხვავდებოდა. ამიტომ, ნაკლებად სავარაუდოა, რომ სახეობებს შორის განსხვავებები წაშალოს 20 გენეტიკური ცვლილებაც კი.
სამეცნიერო საზოგადოება მტკიცებულებებს ითხოვს. კომპანიას ჯერჯერობით არ გამოუქვეყნებია რაიმე მონაცემი, რომელიც მის მიერ შექმნილი მგლის ბოკვრების უნიკალურობას დაადასტურებს. ამ ეტაპზე, Colossal ინფორმაციის მხოლოდ პრესრელიზებითა და პოპულარული მედიით გაზიარებას ამჯობინებს. შესაძლოა, ეს კომპანიის კიდევ ერთი მარკეტინგული ხრიკია, რომელიც თავის პროექტებზე ყურადღების მიპყრობას ცდილობს.
