კრემლმა „პუტინის იდეოლოგის“ ალექსანდრ დუგინის ქალიშვილის, დარია დუგინას, მოსკოვში გამართული დაკრძალვა ისეთ ღონისძიებად აქცია, სადაც დამსწრეებმა რუსეთის პრეზიდენტის, ვლადიმერ პუტინისა და მისი უკრაინის განადგურების გეგმებისადმი ერთგულება გამოხატეს.
სახელმწიფო დუმის დეპუტატმა და ლიბერალური და პოლიტიკური პარტიის ლიდერმა ლეონიდ სლუცკიმ გამოსამშვიდობებელ ცერემონიაზე გამოსვლისას გერმანელი ნაცისტების მიერ გამოყენებული სლოგანის მსგავსი წარმოთქვა: „ერთი ქვეყანა. ერთი პრეზიდენტი. ერთი გამარჯვება“, - თქვა მან (ნაცისტურ გერმანიაში: „ერთი ხალხი, ერთი რაიხი, ერთი ფიურერი“ - რედ.).
მან ასევე შესთავაზა კიევის ერთ-ერთ ქუჩას დუგინას სახელი „ნაციზმისგან გათავისუფლებული“ დაერქვას.
დუგინას სიკვდილში მონაწილე პირებისთვის „საერთაშორისო ტრიბუნალზე“ ისაუბრა პროსამთავრობო პარტიის „სამართლიანი რუსეთის“ ლიდერმა სერგეი მირონოვმაც. მან განაცხადა, რომ „ფაშიზმი უნდა განადგურდეს მის ბუნაგში, რომელიც, სამწუხაროდ, ახლა კიევშია“. ის მიიჩნევს, რომ ამ „ფაშიზმის“ შემქმნელები ვაშინგტონში იმყოფებიან.
დაკრძალვაზე დამსწრე კრემლის ერთ-ერთმა მთავარმა პროპაგანდისტმა, დიმიტრი კისელევმა, დუგინას გარდაცვალების შემდეგ მოუწოდა „კიდევ უფრო გაძლიერებისკენ“ და „უკომპრომისო დენაციტიზაციისა და დემილიტარიზაციისკენ“.
თავად დუგინას მამამ თქვა, რომ მან თავის ქალიშვილს ასწავლა, რომ რუსეთი იმპერიაა. ის ასევე მოუწოდებდა „რუსეთის გამარჯვებისკენ“. მისი თქმით, „ყველაზე დიდი ფასი, რომელიც უნდა გადაიხადო, მხოლოდ გამარჯვებით შეიძლება გამართლდეს“.
20 აგვისტოს, მოსკოვის ოლქში აფეთქდა მანქანა, რომელშიც რუსული პროპაგანდისტული გამოცემა RT-სთვის მომუშავე „პუტინის იდეოლოგის“, ალექსანდრე დუგინის ქალიშვილი, დარია დუგინა იმყოფებოდა.
უკრაინის პრეზიდენტის ადმინისტრაცია უარყოფს კიევის მონაწილეობას დუგინას მკვლელობაში.
რუსეთი აცხადებდა, რომ დუგინას მკვლელობა უკრაინის სპეცსამსახურებმა განახორციელეს და რომ ასაფეთქებელი მოწყობილობა დისტანციურად ამოქმედდა. რუსეთის ფედერალური უსაფრთხოების სამსახურმა (FSB) განაცხადა, რომ აფეთქებაში პასუხისმგებელი უკრაინელი ქალი, ნატალია ვოვკი, აზოვის ბატალიონში მსახურობდა, რასაც პოლკის ჯარისკაცები უარყოფენ.
ეროვნული უშიშროებისა და თავდაცვის საბჭოს მდივანმა ალექსეი დანილოვმა განაცხადა, რომ კრემლის იდეოლოგის, ალექსანდრე დუგინის ქალიშვილი, დარია, რუსეთის სპეცსამსახურებმა მოკლეს და უკრაინას ამაში არანაირი კავშირი არ ჰქონია.
