საგანგებო შეხვედრაზე ევროკავშირის ქვეყნებმა დაამტკიცეს გეგმა გაზზე მოთხოვნის ნებაყოფლობით შემცირების შესახებ. მათ მიაღწიეს კომპრომისულ შეთანხმებებს ზოგიერთი ქვეყნის მოხმარების შესამცირებლად, რადგან ისინი რუსეთიდან მიწოდების შემდგომი შემცირებისთვის ემზადებიან.
მხოლოდ უნგრეთმა გამოთქვა წინააღმდეგობა.
გადაწყვეტილება მას შემდეგ მიიღეს, რაც „გაზპრომმა“ გუშინ „ნორდ სტრიმის“ მეშვეობით გაზის მიწოდების კიდევ უფრო შემცირების შესახებ განაცხადა.
რუსი მომწოდებელი ტექნიკურ მიზეზებს ასახელებს. ამასობაში, ევროპის ბაზრებზე გაზის ფასებმა ახალ რეკორდულ მაქსიმუმს მიაღწია
ევროკავშირის ენერგეტიკის მინისტრების მიერ დამტკიცებული გეგმა ითვალისწინებს გაზის მოხმარების ნებაყოფლობით შემცირებას 15%-მდე, რომელიც დაიწყება მიმდინარე წლის აგვისტოდან და დასრულდება მომავალი წლის მარტში. ამის შესახებ ევროკომისიამ მას შემდეგ განაცხადა, რაც ევროკავშირის ქვეყნებმა პირობა დადეს, რომ ყველაფერს გააკეთებენ ამ მიზნის მისაღწევად.
აღნიშნულია, რომ ამ გზით ისინი შეძლებენ მოემზადონ მომავალი ზამთრისთვის, რაც, ექსპერტების აზრით, ძალიან რთული იქნება.
„15%-იანი შემცირების შესახებ კოლექტიური შეთანხმება გადამწყვეტია და დაგვეხმარება ზამთრის დადგომამდე ჩვენი რეზერვების შევსებაში. გარდა ამისა, ევროკავშირის მიერ წევრ სახელმწიფოებში გაზის მოხმარების სავალდებულო შემცირების მაღალი მზადყოფნის მდგომარეობის გამოცხადების შესაძლებლობა ძლიერ სიგნალს აგზავნის იმის შესახებ, რომ ევროკავშირი ყველაფერს გააკეთებს მიწოდების უსაფრთხოების უზრუნველსაყოფად და მომხმარებლების, იქნება ეს ოჯახები თუ ინდუსტრია, დასაცავად“, - აღნიშნულია განცხადებაში.
„როიტერის“ ცნობით, გადაწყვეტილების წინააღმდეგ ერთადერთი ქვეყანა უნგრეთი იყო. გერმანიის ეკონომიკის მინისტრმა აღნიშნა, რომ შეთანხმების მიზანი იყო რუსეთის პრეზიდენტისთვის ეჩვენებინა, რომ ევროპა ერთიანი რჩება მოსკოვის მიერ გაზის მიწოდების ბოლო შემცირების ფონზე. ევროპული თანამეგობრობის შეთანხმება მას შემდეგ მიიღეს, რაც „გაზპრომმა“ წინა დღეს განაცხადა, რომ გაანახევრებდა გაზის მიწოდებას „ჩრდილოეთის ნაკადი 1“-ის მილსადენით, რომელიც აქამდე 40%-ით იყო. შესაბამისად, რუსეთი მოცულობის მხოლოდ 20 პროცენტს მიაწვდის.
„გაზპრომმა“ ტექნიკური მიზეზები დაასახელა, მიუხედავად იმისა, რომ მილსადენი ცოტა ხნის წინ დაგეგმილი ტექნიკური მომსახურების გამო დაიხურა. გერმანიის ხელისუფლება კი ამტკიცებს, რომ ასეთი პრობლემა არ არსებობს. უკრაინის პრეზიდენტმა ვოლოდიმირ ზელენსკიმ მოსკოვი ეკონომიკური ომის წარმოებაში დაადანაშაულა და ევროპის ქვეყნებს მოუწოდა, წინააღმდეგობა გაეწიათ ზეწოლისთვის და ამის ნაცვლად კიდევ უფრო მკაცრი სანქციებით ეპასუხათ.
„ტერორისტულ სახელმწიფოს გაზის შანტაჟი სჭირდება, რომელიც ყოველთვიურად უარესდება, რათა ყველა ევროპელს ცხოვრება გაურთულოს. ეს კი რეალურად შეიძლება ჩაითვალოს სტიმულად იმისა, რომ ევროკავშირის მერვე სანქციების პაკეტი მნიშვნელოვნად უფრო ძლიერი იყოს, ვიდრე ცოტა ხნის წინ დამტკიცებული მეშვიდე“, - განაცხადა ზელენსკიმ.
ამასობაში, ევროპულ ბირჟებზე გაზის ფასმა ახალი რეკორდი დაამყარა და ათას კუბურ მეტრზე 2,200 დოლარს გადააჭარბა. ეს პირველი შემთხვევაა მიმდინარე წლის მარტის შემდეგ.
