რუმინეთის საგარეო საქმეთა სამინისტრომ რუსეთის უშიშროების საბჭოს თავმჯდომარის მოადგილის, დიმიტრი მედვედევის მიერ გავრცელებული რუკა, რომელიც უკრაინის მეზობელ სახელმწიფოებს შორის „გაყოფის გეგმას“ ასახავს, პროპაგანდასა და დეზინფორმაციას უწოდა.
„ევროპული პრავდას“ ცნობით, ამის შესახებ ოფიციალური ბუქარესტის განცხადებაშია ნათქვამი
„ჩვენ ასეთ ქმედებებს მივიჩნევთ პროპაგანდისა და დეზინფორმაციის იმ ინსტრუმენტების ნაწილად, რომლებსაც რუსეთის ფედერაცია დიდი ხანია იყენებს... „წინადადებები“ და „ანალიზები“, რომლებიც შემთხვევით ცვლიან სახელმწიფო საზღვრებს და ხელს უწყობენ საერთაშორისო სამართლის დარღვევას, სხვა არაფერია, თუ არა სრულიად წარუმატებელი მცდელობები, გაამართლონ საკუთარი ქმედებები, რომლებიც არღვევს წესებზე დაფუძნებულ საერთაშორისო წესრიგს“, - განაცხადა რუმინეთის საგარეო საქმეთა სამინისტრომ.
განცხადებაში ასევე აღნიშნულია, რომ რუმინეთი სრულად უჭერს მხარს უკრაინის სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში და გმობს რუსეთის არაპროვოცირებულ და გაუმართლებელ აგრესიას.
„რუმინეთი არის და დარჩება უკრაინის პარტნიორად და კიდევ ერთხელ ადასტურებს სრულ მხარდაჭერას და ღრმა სამძიმარს უკრაინელი ხალხის მიმართ“, - ნათქვამია საგარეო საქმეთა სამინისტროს განცხადებაში.
ოფიციალურმა ბუქარესტმა ასევე კიდევ ერთხელ დაადასტურა უკრაინისთვის ევროკავშირის წევრობის კანდიდატის სტატუსის მინიჭების მხარდაჭერა.
როგორც „უკრაინსკა პრავდა“ იტყობინება, მედვედევმა გამოაქვეყნა რუკა, რომელიც, სავარაუდოდ, „დასავლელმა ანალიტიკოსებმა“ შექმნეს და რომელიც უკრაინის მთელ ტერიტორიას, კიევის ოლქის გარდა, მეზობლებს შორის ყოფს. მან ასევე რუმინეთს ჩერნოვცისა და ვინიცის ოლქები „გადასცა“.
