მსოფლიოში უდიდესმა კრიპტო ბირჟამ, Binance-მა, რუსებსა და რუსეთში მცხოვრებ ფიზიკურ პირებს P2P სერვისის მეშვეობით დოლარისა და ევროს ყიდვა-გაყიდვის შესაძლებლობა აუკრძალა. Forbes-ს ბირჟის წარმომადგენელმა განუცხადა, რომ Binance-მა ამ გადაწყვეტილების მიზეზად ევროკავშირის სანქციების მეათე რაუნდით დაწესებული შეზღუდვები დაასახელა.
„Binance P2P-ის გამოყენების გასაგრძელებლად, მომხმარებლებს შეუძლიათ აირჩიონ სხვა ხელმისაწვდომი ფიატ ვალუტები“, - განმარტა ბირჟის წარმომადგენელმა. როგორც ბიტკოინის ჟურნალი Forklog აღნიშნავს, ევროკავშირის მოქალაქეებს ეკრძალებათ Binance P2P-ის რუბლებში გამოყენება. ტრანზაქციის განხორციელების მცდელობისას, ბირჟა მათ ვალუტის შეცვლისკენ მოუწოდებს.
რუსებმა P2P კრიპტოვალუტის გაცვლის სერვისების აქტიურად გამოყენება 2022 წელს დაიწყეს, მას შემდეგ, რაც SWIFT გადარიცხვები შეიზღუდა. P2P სერვისების გამოყენება შესაძლებელია კრიპტო საფულეებს შორის თანხის გადარიცხვისთვის ან კრიპტოვალუტის შესაძენად. კრიპტოვალუტებზე, კერძოდ, USDT სტაბილურ კოინზე (აშშ დოლართან მიბმული კრიპტოვალუტა), რუსეთში მოთხოვნა მკვეთრად გაიზარდა 21 სექტემბერს ნაწილობრივი მობილიზაციის გამოცხადების შემდეგ. ყველაზე ხშირად, გაცვლა P2P-ის საშუალებით Binance-ის ან Garantex-ის ბირჟებზე ხდებოდა.
2022 წლის აპრილში, რუსეთის წინააღმდეგ ევროკავშირის სანქციების მეხუთე რაუნდის გამო, Binance-მა შეზღუდა წვდომა რუსეთიდან მომხმარებლებისთვის. კლიენტებს, რომელთა საფულეში 10,000 ევროზე მეტი იყო, მხოლოდ თანხის გატანა შეეძლოთ; დეპოზიტები ან ვაჭრობა აკრძალული იყო.
მაისში, ევროკავშირის სანქციების გამო, კრიპტოვალუტის ბირჟამ Coinbase-მა რუს მომხმარებლებს შეზღუდვები დააკისრა: ბირჟამ 10 000 ევროზე მეტი საფულეების მქონე კლიენტებს ანგარიშებზე წვდომა გაუუქმა.
