Airbus-მა წარმოადგინა შერეული ფრთების მქონე Maverick-ის ორი მეტრის სიგრძის პროტოტიპი. დიზაინს უნიკალური თავისებურება აქვს: ამ მოდელის ფიუზელაჟი შეუფერხებლად გადადის ფრთებში.
ექსპერიმენტული Maveric, დისტანციურად მართვადი მოდელი, სინგაპურის ავიაშოუზე წარადგინეს. თვითმფრინავის დიზაინი აერთიანებს სამგზავრო სალონს, ფრთას და საწვავის განყოფილებებს, ხოლო ორი ძრავა „მფრინავი ფრთის“ ზემოთ არის განთავსებული. კომპანიის თქმით, ეს 20%-ით შეამცირებს საწვავის მოხმარებას და ბორტზე ხმაურს. Bloomberg-ის ცნობით, ასევე გაიზრდება ფეხებისთვის განკუთვნილი ადგილი და დერეფნის სივრცე.
თუმცა, დეველოპერებს მოუწევთ გარკვეული ნაკლოვანებების გამოსწორება, მათ შორის, „როიტერის“ ცნობით, მართვის სირთულე და მგზავრებში მოძრაობისას გულისრევის სიმძიმე, რაც გამოწვეულია სავარძლების ცენტრიდან უფრო შორს განლაგებით. Airbus-ს ასევე მოუწევს კიდევ ერთი საკითხის მოგვარება: სალონში ფანჯრები იქნება თუ ვიდეოეკრანები.
Airbus-მა Maveric-ის შემუშავება 2017 წელს დაიწყო, პირველი ტესტები კი 2019 წლის ზაფხულში საფრანგეთში ჩატარდა. კომპანია ამჟამად თვითმფრინავის სალონისა და აეროპორტის ინტეგრაციაზე მუშაობს. თვითმფრინავის საწყისი ექსპლუატაციის თარიღი და სავარაუდო ღირებულება ჯერ არ გამოცხადებულა.
გასულ კვირას Airbus-მა ჩინეთში წარმოება შეაჩერა. ეს გადაწყვეტილება „ჩინეთის მთავრობის მოთხოვნების“ შესაბამისად იქნა მიღებული. აღინიშნა, რომ ეს კომპანიისთვის მტკივნეული გადაწყვეტილება იყო, რადგან ამჟამად ის ვიწროკორპუსიანი თვითმფრინავების მზარდ მოთხოვნასთან გამკლავებას ცდილობს.
