იაპონურმა კორპორაციამ Tsugami-მ რუსეთში მაღალი სიზუსტის ლითონის დამუშავების მანქანებისა და კომპონენტების მიწოდება 2021 წელს არსებული 2.5 მილიონი დოლარიდან 2024 წელს 62 მილიონ დოლარამდე გაზარდა, რაც 20-ჯერ მეტია.
ეს მანქანები შეუცვლელია სამხედრო წარმოებისთვის, რაც იმას ნიშნავს, რომ მათი რუსეთში მიწოდება პირდაპირ კვებავს ქვეყნის სამხედრო-სამრეწველო კომპლექსს.
საბაჟო დოკუმენტები ადასტურებს, რომ თითქმის ყველა მანქანა ახალია — 2024 წელს იმპორტირებული 206 პარტიიდან მხოლოდ ოთხს ეწერა „მეორადი“. ოფიციალურად, მარაგი ჩინეთიდან მოდის, ძირითადად Ele Technology-ს მეშვეობით, კომპანიისა, რომელსაც აშშ-მ 2024 წლის ოქტომბერში სანქციები დაუწესა. სხვა მსხვილი შუამავლები არიან Shenzhen Yile Equipment, Lewin Limited და Grun Grup Limited.
რუსეთში მთავარი მყიდველი იყო AMG LLC, რომელიც სანქციების ქვეშაა და ბაზრის 87%-ს აკონტროლებს. ეს კომპანია წინა გამოძიებებში უკვე დასახელდა, როგორც რუსეთის სამხედრო-სამრეწველო კომპლექსისთვის დაზგების ძირითადი მიმწოდებელი, მათ შორის ტაივანიდან აღჭურვილობის. იშვიათ შემთხვევებში, შესყიდვებს ახორციელებდნენ საბოლოო მომხმარებლები, როგორიცაა OKB Aerospace Systems (Ka-226 ვერტმფრენის ბორტ სისტემების მწარმოებელი) და Dubna Cable Plant, მაგრამ ასეთი ტრანზაქციები 2024 წელს გამონაკლისი იყო.
იაპონიის ეკონომიკის, ვაჭრობისა და მრეწველობის სამინისტრომ აღიარა, რომ იაპონური აღჭურვილობის პირდაპირი მიწოდება რუსეთში აკრძალულია, თუმცა სანქციებისგან თავის არიდება მესამე ქვეყნების მეშვეობით კვლავ შეშფოთების საგანია. „ჩვენ ორიენტირებული ვართ სანქციებისგან თავის არიდებაში ჩართული მესამე ქვეყნების ორგანიზაციების იდენტიფიცირებაზე“, - განაცხადა სამინისტრომ და აღნიშნა, რომ Tsugami-ს ჩინეთში საწარმოო ობიექტი აქვს და, სხვა იაპონური კომპანიების მსგავსად, მას ექსპორტის კონტროლის გასაძლიერებლად ინფორმაცია მიეწოდება.
თავად ცუგამიმ უარი თქვა „ინსაიდერის“ კითხვებზე პასუხის გაცემაზე, არც ტელეფონით და არც წერილობით. ამასობაში, გაყიდვების მაჩვენებლები აჩვენებს, რომ ომი ზოგიერთისთვის უპრეცედენტო მოგების წყაროდ იქცა.
