პროტეინის კოქტეილები სხეულის მასის მომატების მსურველი ბოდიბილდერებისთვის აუცილებელ ინსტრუმენტად ითვლება. თუმცა, ბოლო დროს მათი პოპულარობა გაიზარდა მათ შორისაც კი, ვისაც სპორტდარბაზში ფეხი არასდროს დაუდგამს. და ეს არც ისე ცუდია!
ბოლო მონაცემებით, გლობალური ცილის ბაზარი 2028 წლისთვის 32.3 მილიარდ დოლარს მიაღწევს (2021 წლის 20.6 მილიარდ დოლართან შედარებით). ეს პოპულარობა განპირობებულია იმით, რომ ცილას მოიხმარენ არა მხოლოდ სპორტსმენები, არამედ ისინიც, ვინც წონის დაკლების, დიეტის გაუმჯობესების ან კუნთების აშენების პარალელურად კუნთოვანი მასის შენარჩუნებას ცდილობს (თუმცა ექსპერტების თქმით, ვარჯიშის გარეშე ამას ვერ მიაღწევენ).
ეჭვგარეშეა, რომ ცილა სასიცოცხლოდ მნიშვნელოვანია კარგი ჯანმრთელობისთვის. ორგანიზმი მას ამინომჟავებად შლის, რომლებიც აუცილებელია კუნთებისა და უჯრედების ასაშენებლად. ის ასევე აუცილებელია იმუნური სისტემის სათანადო ფუნქციონირებისთვის.
მისი მიღება ტრადიციული საკვებიდან, როგორიცაა კვერცხი, ხორცი, თევზი და ბოსტნეული და მწვანილიც კი, ადვილად შეგვიძლია. მიუხედავად იმისა, რომ საკვები ნივთიერებების მიღება, რა თქმა უნდა, სასურველია, არსებობს ადამიანთა გარკვეული ჯგუფები, რომლებსაც ასეთი დანამატები სჭირდებათ.
ვის სჭირდება ცილოვანი კოქტეილები?
ეს სასმელები, ძირითადად, პროფესიონალი სპორტსმენებისა და იმ ადამიანებისთვისაა განკუთვნილი, რომლებსაც დამატებითი ცილა სჭირდებათ, მათ შორის მათთვის, ვისაც მადა აკლია ან დაავადებას ებრძვის. ბოლოდროინდელი კვლევა ასევე მიუთითებს, რომ ასეთი სასმელები შეიძლება სასარგებლო იყოს 65 წელს გადაცილებული ადამიანებისთვის, რადგან ამ ასაკობრივი ჯგუფის 85%-მდე საკმარის ცილას არ იღებს.
ამასობაში, ხანდაზმული ადამიანები ყველაზე მეტად მიდრეკილნი არიან კუნთოვანი მასისა და ძალის შემცირებისკენ. ამან შეიძლება გავლენა მოახდინოს მათ ფიზიკურ ფუნქციასა და ჯანმრთელობაზე. 65 წელზე უფროსი ასაკის ადამიანებისთვის ცილის მიღების ამჟამინდელი რეკომენდაციები სხეულის წონის ყოველ კილოგრამზე 1-1,2 გრამი ცილის მიღებას გულისხმობს; ჯანმრთელობის პრობლემების მქონე ადამიანებისთვის ეს რაოდენობა შეიძლება უფრო მაღალი იყოს. ეს საკმაოდ ბევრია! ბევრ ხანდაზმულს არ შეუძლია ამ დონის შენარჩუნება დამოუკიდებლად, სწორედ ამიტომ შეიძლება სასარგებლო იყოს ცილოვანი სასმელები.
