კატალონიის ღია უნივერსიტეტის მეცნიერებმა აღმოაჩინეს, რომ ადამიანებს, რომლებიც ბავშვობაში აქტიურად თამაშობდნენ ვიდეო თამაშებს, გაუმჯობესებული კოგნიტური შესაძლებლობები აქვთ. კერძოდ, ისინი უკეთ იმახსოვრებენ ინფორმაციას და უკეთესად ახერხებენ სამგანზომილებიანი სივრცის გაგებას, ასევე, გაუმჯობესებული რეაქციის დრო აქვთ იმ ადამიანებთან შედარებით, რომლებიც ბავშვობაში ვიდეო თამაშებს არ თამაშობდნენ.
კვლევაში შედარდა ზრდასრულთა ორი ჯგუფი — ისინი, ვინც ბავშვობაში თამაშობდნენ ვიდეო თამაშებს და ისინი, ვინც არ თამაშობდა. მკვლევარებმა თავდაპირველად განსაზღვრეს მონაწილეთა საწყისი კოგნიტური უნარები და შემდეგ ორივე ჯგუფს სთხოვეს, რომ 10 დღის განმავლობაში ყოველდღიურად 1.5 საათის განმავლობაში ეთამაშათ Super Mario 64.
მონაწილეთა კოგნიტური შესაძლებლობები ხელახლა გაიზომა. საბოლოო გაზომვა 15 დღის შემდეგ ჩატარდა, როდესაც ისინი ვიდეო თამაშს აღარ თამაშობდნენ. ექსპერიმენტისთვის Super Mario 64 შეირჩა, რადგან ადრე დადასტურდა, რომ ის ტვინში ნაცრისფერ ნივთიერებას ზრდიდა.
ექსპერიმენტმა აჩვენა, რომ მონაწილეებს, რომლებსაც ბავშვობაში არასდროს უთამაშიათ ვიდეო თამაშები, თავდაპირველად უფრო დაბალი კოგნიტური შესაძლებლობები ჰქონდათ. თუმცა, Super Mario 64-ის 10-დღიანი თამაშის შემდეგ, მათი ტვინის აქტივობა გაიზარდა იმავე დონემდე, როგორც იმ ადამიანების, რომლებიც ბავშვობაში თამაშობდნენ ვიდეო თამაშებს. ამრიგად, აქტიურმა ვიდეო თამაშებმა ასტიმულირება გაუწია იმ ადამიანების ტვინს, რომლებსაც ადრე არ უთამაშიათ ვიდეო თამაშები. გარდა ამისა, მკვლევარებმა ხაზგასმით აღნიშნეს, რომ მათ, ვინც ბავშვობაში თამაშობდა ვიდეო თამაშებს, ეს კოგნიტური სარგებელი ზრდასრულ ასაკში არ დაუკარგავთ.
