მოწყობილობა შეიმუშავა მეცნიერთა საერთაშორისო ჯგუფმა სანქტ-პეტერბურგის მკვლევარებთან თანამშრომლობით. ლაზერის ზომა ერთ მილიმეტრზე სამ ათასჯერ პატარაა.
მეცნიერებმა შექმნეს მსოფლიოში ყველაზე პატარა ნახევარგამტარული ლაზერი. შემუშავება განახორციელა მეცნიერთა საერთაშორისო ჯგუფმა სანქტ-პეტერბურგის საინფორმაციო ტექნოლოგიების, მექანიკისა და ოპტიკის ეროვნული კვლევითი უნივერსიტეტის მკვლევარებთან თანამშრომლობით. ამის შესახებ რუსეთის უნივერსიტეტის პრესსამსახურმა განაცხადა.
„მეცნიერთა ჯგუფმა გამოაცხადა მსოფლიოში ყველაზე კომპაქტური ნახევარგამტარული ნანოლაზერის შექმნის შესახებ, რომელიც ოთახის ტემპერატურაზე ხილულ დიაპაზონში მუშაობს“, - ნათქვამია განცხადებაში.
აღსანიშნავია, რომ ეს ლაზერი პეროვსკიტის ნანონაწილაკია. მოწყობილობის ზომა 310 ნანომეტრია, რაც ერთ მილიმეტრზე 3000-ჯერ ნაკლებია.
მკვლევრებმა ნანოლაზერისთვის პეროვსკიტი აირჩიეს, რადგან მას შეუძლია იმოქმედოს როგორც აქტიური გარემოს, ასევე რეზონატორის როლში, რაც იმას ნიშნავს, რომ მას შეუძლია ლაზერული გამოსხივების გენერირება და ელექტრომაგნიტური ენერგიის დიდი ხნის განმავლობაში შენარჩუნება.
„მიღებული ნანოლაზერის უნიკალურობა მხოლოდ მის ზომაში არ მდგომარეობს. ის ასევე კარგად ინარჩუნებს სტიმულირებული ემისიის ენერგიას, რაც უზრუნველყოფს ელექტრომაგნიტური ველების საკმარის გაძლიერებას ლაზერის გენერირებისთვის“, - განაცხადეს მეცნიერებმა.
მკვლევრებმა ხაზგასმით აღნიშნეს, რომ ახალი მოწყობილობა ნორმალურ პირობებში მუშაობს — სტანდარტული ატმოსფერული წნევისა და ოთახის ტემპერატურის პირობებში.
მეცნიერები ამტკიცებენ, რომ ამ ლაზერის გამოყენება შესაძლებელია ოპტიკური ჩიპების, სენსორების და სხვა მოწყობილობების შესაქმნელად, რომლებიც სინათლეს იყენებენ ინფორმაციის გადასაცემად და დასამუშავებლად.
