„გამარჯობა, მე ნავალნი ვარ. მენატრები. ჯერ კიდევ ბევრი არაფერი ვიცი, მაგრამ გუშინ მთელი დღე დამოუკიდებლად ვსუნთქავდი. სრულიად დამოუკიდებლად. გარე დახმარების გარეშე, ყელში უბრალო სარქველიც კი არ მქონდა. ძალიან მომეწონა. საოცარი პროცესი, ბევრის მიერ დაუფასებელი. გირჩევთ“, - ნათქვამია პოსტში.
ნავალნი ამჟამად გერმანიის „შარიტეს“ საავადმყოფოში იმყოფება, სადაც ის ომსკიდან გადაიყვანეს. 20 აგვისტოს, ოპოზიციის ლიდერის ტომსკიდან მოსკოვის რეისით მიმავალი თვითმფრინავი ამ ქალაქში საგანგებო დაშვება განახორციელა მას შემდეგ, რაც ბორტზე მისი მდგომარეობა გაუარესდა.
გერმანიის მთავრობამ განაცხადა, რომ ნავალნის ნიმუშებში „ნოვიჩოკის ჯგუფის“ ნივთიერების არსებობა სამმა დამოუკიდებელმა ლაბორატორიამ დაადასტურა: გერმანულმა სამხედრო ლაბორატორიამ და საფრანგეთისა და შვედეთის ლაბორატორიებმა. საფრანგეთის პრეზიდენტმა ემანუელ მაკრონმა ფრანგი ექსპერტების დასკვნების შესახებ რუსეთის პრეზიდენტ ვლადიმერ პუტინს პირადად აცნობა 14 სექტემბერს გამართული სატელეფონო საუბრის დროს.
ამასობაში, რუსეთის ხელისუფლება უარყოფს, რომ ნავალნი მოწამლეს. კერძოდ, საგარეო დაზვერვის სამსახურის დირექტორმა, სერგეი ნარიშკინმა, განაცხადა, რომ პოლიტიკოსს ქვეყნიდან გამგზავრების დროს ორგანიზმში ტოქსიკური ნივთიერებები არ ჰქონდა და რომ რუსეთში „ნოვიჩოკის“ ყველა მარაგი განადგურდა ქიმიური იარაღის აკრძალვის ორგანიზაციის პროტოკოლების შესაბამისად.
