რუსეთი დნესტრისპირეთს მოლდოვაზე ზეწოლისთვის იყენებს, - ამის შესახებ მოლდოვას პრეზიდენტმა მაია სანდუმ JurnalTV-სთან ინტერვიუში განაცხადა.
„კრემლი ამას მოლდოველების დასაშინებლად აკეთებს, განსაკუთრებით იმის გათვალისწინებით, რომ არჩევნების წელს ვართ“, - თქვა მან.
ამავდროულად, მისი აზრით, „დღეს რუსეთის ფედერაციას დნესტრისპირეთში არაფრის გაკეთება არ შეუძლია, თუნდაც ამის სურვილი ჰქონდეს“.
„რაიმე მიზნის მისაღწევად, მოსკოვმა უნდა შეცვალოს მთავრობა კიშინიოვში და იგივე კორუმპირებული ჩინოვნიკები დააბრუნოს ხელისუფლებაში. ჩვენ არ შეგვიძლია მათ ამის უფლება მივცეთ. ჩვენ უნდა შევინარჩუნოთ მშვიდობა. ჩვენი მშვიდობა დამოკიდებულია ჩვენს ერთიანობასა და მანიპულაციებისადმი წინააღმდეგობის გაწევის უნარზე“, - განაცხადა სანდუმ.
„მოლდოვა დაიცავს თავის თავისუფლების უფლებას, მათ შორის არჩევანის თავისუფლებას“, - თქვა მან. „და ეს არჩევანი ევროპული ინტეგრაციაა. (...) მინდა აბსოლუტურად ნათელი ვიყო. ჩვენ არაფერი გვაქვს რუსების წინააღმდეგ; ჩვენ რუსული ტანკების წინააღმდეგი ვართ. ჩვენ უბრალოდ გვინდა, რომ რუსეთის ფედერაციამ, სხვა სახელმწიფოების მსგავსად, პატივი სცეს მოლდოვას და მოლდოვას მოქალაქეების არჩევანს. ჩვენ დემოკრატიული ქვეყანა ვართ და ჩვენ ჯერ კიდევ გვჭირდება ამ დემოკრატიის გაძლიერება, მაგრამ ხალხი თავად გადაწყვეტს, რა გააკეთოს, სად წავიდეს და ვისთან ითანამშრომლოს“.
მოლდოვას რეინტეგრაციის საკითხებში ვიცე-პრემიერმა, ოლეგ სერებრიანმა, Euronews Romania-სთან ინტერვიუში განაცხადა, რომ რუსეთი დნესტრისპირეთის დამოუკიდებლობას არ აღიარებს.
„მე არ მგონია, რომ დნესტრისპირეთის დეპუტატთა კონგრესის მხარდაჭერის მოწოდების შემდეგ, რუსეთმა აღიაროს რეგიონის დამოუკიდებლობა“, - თქვა მან.
ის მიიჩნევს, რომ „კონგრესის მიერ რუსეთისადმი მხარდაჭერისკენ მოწოდება დნესტრისპირეთის რეალური პრობლემების შენიღბვას ისახავს მიზნად“.
„ეს არის ოპერაცია, რომელიც მიმართულია ტირასპოლის რეჟიმის პრობლემების შენიღბვისკენ, რაც რეგიონის მაცხოვრებლებთან აქვს. ეკონომიკური და სოციალური მდგომარეობა ცუდია და ეს ხალხს უნდა აუხსნას. სწორედ ამიტომ აცხადებს რეჟიმი, რომ ყველა ბოროტების დედა კიშინიოვშია საბაჟო გადასახადების გამო (რომლებიც 2024 წლის დასაწყისში შემოიღეს - IF). სინამდვილეში, რეგიონში ყველაფერი არასდროს ყოფილა კარგად. თუმცა, რა თქმა უნდა, (სიტუაცია გაუარესდა - IF) (...) უკრაინის საზღვრის დნესტრისპირეთის მონაკვეთის დახურვის შემდეგ“, - აღნიშნა სერებრიანმა.
მან განაცხადა, რომ „თუ ტირასპოლის რეჟიმს ბიუჯეტის პრობლემები აქვს, მან უნდა გადახედოს პოლიციის, უსაფრთხოებისა და არმიის ხარჯებს“. „მე მათ ამის შესახებ არაერთხელ მივეცი რჩევა. რეგიონის სამხედრო ხარჯები გაზვიადებულია. (...) დნესტრისპირეთის ბიუჯეტის დაახლოებით მეოთხედი უსაფრთხოებისა და თავდაცვისთვის იხარჯება - თითქმის 250 მილიონი ევრო“, - დასძინა მან.
ამავდროულად, მან აღნიშნა ევროკავშირის მზარდი როლი დნესტრისპირეთის ეკონომიკურ ცხოვრებაში და განმარტა, რომ „ევროკავშირი მისი საგარეო ვაჭრობის თითქმის 70%-ს შეადგენს“.
28 თებერვალს, დნესტრისპირეთის დეპუტატთა ყველა დონის კონგრესმა რუსეთს მოუწოდა, დაეცვა დნესტრისპირეთი „მოლდოვას მხრიდან მზარდი ზეწოლის“ ფონზე. გარდა ამისა, პარლამენტარებმა მიმართეს ეუთო-ს, დსთ-ს, ევროპარლამენტს, წითელი ჯვრის საერთაშორისო კომიტეტს და გაეროს გენერალურ მდივანს, „მოეხდინათ გავლენა მოელოდნენ მოლდოვას ხელმძღვანელობაზე“, რომელმაც დნესტრისპირეთის წინააღმდეგ „ეკონომიკური ომი“ დაიწყო და ტირასპოლთან მოლაპარაკებები დაბლოკა.
