ისრაელის პრემიერ-მინისტრი ბენიამინ ნეთანიაჰუ სახლში გონების დაკარგვის შემდეგ საავადმყოფოში გადაიყვანეს, - ამის შესახებ The Jerusalem Post იუწყება.
73 წლის ნეთანიაჰუ გამოკვლევისთვის თელ-ჰაშომერში, შებას სამედიცინო ცენტრში გადაიყვანეს. ეს ინფორმაცია გაზეთს პრემიერ-მინისტრის ადმინისტრაციამ დაუდასტურა.
ნეთანიაჰუ შაბათს შუადღისას საავადმყოფოში გადაიყვანეს. გაზეთ „შებას“ სამედიცინო ცენტრის წყაროების ცნობით, პრემიერ-მინისტრმა კესარიაში, საკუთარ სახლში გონება დაკარგა, რის გამოც დაეცა და თავი იატაკს დაარტყა. ასევე, გავრცელებული ინფორმაციით, ის გულმკერდის არეში ტკივილს უჩიოდა.
ისრაელის პრემიერ-მინისტრი თელ-აივის ცენტრთან ახლოს მდებარე საავადმყოფოს სასწრაფო დახმარების განყოფილებაში გადაიყვანეს. გავრცელებული ინფორმაციით, ნეთანიაჰუ სამედიცინო ცენტრში მისვლისას გონზე იყო.
„იერუსალიმ პოსტის“ ცნობით, ნეთანიაჰუს კომპიუტერული ტომოგრაფია ჩაუტარდა, რათა დარწმუნებულიყვნენ, რომ დაცემის შედეგად ტვინი არ დაზიანებულა.
ნეთანიაჰუს ადმინისტრაციის განცხადების თანახმად, პრემიერ-მინისტრის სამედიცინო შემოწმების დროს არანაირი დარღვევა არ დაფიქსირებულა. ექიმებმა თავდაპირველად უკიდურესად ცხელი ამინდის შედეგად მძიმე დეჰიდრატაცია დაუდგინეს. TASS-ის ცნობით, ნეთანიაჰუს მდგომარეობა დამაკმაყოფილებლად შეფასებულია.
„ექიმების რეკომენდაციით, პრემიერ-მინისტრი დამატებით გამოკვლევებს აგრძელებს“, - განაცხადეს ნეთანიაჰუს ადმინისტრაციაში.
