ეს არის პირველი გადაწყვეტილება იმ ქვეყნის პარლამენტის მიერ, რომელიც ევროკავშირისა და ნატოს წევრია.
ესტონეთის პარლამენტმა გადაწყვიტა, ნატოს მოუწოდოს, აგრესორისთვის, რუსეთისთვის, უკრაინის თავზე საჰაერო სივრცე დაკეტოს.
ამის შესახებ უკრაინის ვერხოვნა რადას სპიკერმა, რუსლან სტეფანჩუკმა განაცხადა.
„ჩემი, უკრაინელი პარლამენტარების და მთელი ერის სახელით, გულწრფელად მადლობას ვუხდი ესტონეთის რესპუბლიკის პარლამენტის თავმჯდომარეს, იური რატასს და ყველა დეპუტატს უკრაინისადმი გამოჩენილი გამბედაობისა და თავდადებისთვის. ეს გადაწყვეტილება მსოფლიოს სხვა პარლამენტებისთვის გადამწყვეტობის მაგალითი უნდა იყოს. ბოლოს და ბოლოს, პარლამენტარები ხალხის წარმომადგენლები არიან. მსოფლიოს ხალხები კი მოითხოვენ გადამწყვეტ ქმედებებს მშვიდობის დასამყარებლად და უკრაინის თავზე ცის დასახურად“, - წერს რუსლან სტეფანჩუკი.
შეგახსენებთ, რომ ზელენსკიმ ნატოს მოუწოდა, უკრაინის თავზე საჰაერო სივრცე დაკეტოს. პრეზიდენტმა გაიხსენა, რომ გასულ წელს მან ნატოს ლიდერები გააფრთხილა, რომ რუსეთის წინააღმდეგ მკაცრი პრევენციული სანქციების გარეშე, ის ომს მიმართავდა.
