ევროკავშირის ქვეყნები კითხვარებს მომავალ კვირას მიიღებენ.
მომავალ კვირას ევროკავშირი საქართველოსა და მოლდოვას გაუგზავნის კითხვარს, რომელიც წევრობის კანდიდატის სტატუსის მინიჭებისთვის აუცილებელია შევსებული იყოს.
ამის შესახებ გაფართოებისა და სამეზობლო პოლიტიკის საკითხებში ევროკომისარმა ოლივერ ვარჰელიმ საკუთარ Twitter-ის გვერდზე განაცხადა.
„ევროკომისიის პრეზიდენტმა ურსულა ფონ დერ ლაიენმა კითხვარი უკრაინას გუშინ (8 აპრილი - რედ.) გადასცა, ორშაბათს კი კითხვარს საქართველოსა და მოლდოვასაც გადავცემ. პასუხები ევროკომისიას დაეხმარება მოამზადოს დასკვნები სამი ქვეყნის ევროკავშირში გაწევრიანების განაცხადთან დაკავშირებით, როგორც ამას ევროპული საბჭო ითხოვს“, - წერს ვარჰელი.
8 აპრილს, ევროკომისიის პრეზიდენტმა ურსულა ფონ დერ ლაიენმა უკრაინის პრეზიდენტ ვოლოდიმირ ზელენსკის კითხვარი გადასცა, რომლის შევსებაც უკრაინისთვის ევროკავშირის წევრობის კანდიდატი სტატუსის მინიჭების აუცილებელი ნაბიჯია. მისი თქმით, უკრაინას ევროკავშირის წევრობის კანდიდატი სტატუსის მიღება 2022 წლის ივნისში შეუძლია.
ომის დაწყებიდან ოთხი დღის შემდეგ, 28 თებერვალს, უკრაინამ ოფიციალურად წარუდგინა ბრიუსელს ევროკავშირის წევრობის განაცხადი და იმედი გამოთქვა, რომ არსებული გარემოებების გათვალისწინებით, ევროკავშირი შეძლებდა პროცესის სწრაფად დაწყებას. 11 მარტს გამართულ ევროკავშირის არაფორმალურ სამიტზე ევროკომისიას პოლიტიკური თანხმობა მიეცა პროცესის დაწყებაზე, თუმცა ზოგიერთმა ქვეყანამ დაჩქარებული პროცესი გააპროტესტა.
უკრაინის განაცხადის შემდეგ, მსგავსი განაცხადები წარადგინეს საქართველომ და მოლდოვამ.
