ნეანდერტალელებისგან მემკვიდრეობით მიღებული გენეტიკური მასალა გავლენას ახდენს თანამედროვე ადამიანების სახის ფორმაზე. კვლევა გამოქვეყნდა ჟურნალ „Communications Biology“-ში.
ლონდონის უნივერსიტეტის კოლეჯის მკვლევრებმა თანამედროვე ადამიანის გენომში ნეანდერტალელებისგან მემკვიდრეობით მიღებული გენეტიკური მასალა აღმოაჩინეს, რომელიც ცხვირის ფორმას განსაზღვრავს. როგორც ჩანს, ეს გენი ბუნებრივი გადარჩევის შედეგი იყო, რადგან უძველესი ადამიანები აფრიკის დატოვების შემდეგ ცივ კლიმატს ადაპტირდნენ.
მეცნიერებმა ანალიზისთვის გამოიყენეს ლათინური ამერიკის 6000-ზე მეტი მოხალისის მონაცემები, რომლებიც შერეული (ევროპელები, ამერიკელი ინდიელები და აფრიკელები) წარმოშობის იყვნენ. მკვლევარებმა შეადარეს მონაწილეთა ფოტოები მათ გენეტიკურ მონაცემებს. კერძოდ, მათ შეისწავლეს სახის სხვადასხვა ნიშნებს შორის მანძილი და ეძებეს გენეტიკური მახასიათებლები, რომლებიც მათ განსაზღვრავს.
მკვლევრებმა სახის ფორმასთან დაკავშირებული 33 გენომური რეგიონი გამოავლინეს, რომელთაგან 26-ის დადასტურება სხვა ეთნიკური ჯგუფების მონაცემებთან შედარებით შეძლეს. მათ ასევე აღმოაჩინეს, რომ ამერიკელი ინდიელებისა და აღმოსავლეთ აზიელი წარმოშობის ადამიანების უმეტესობას ATF3 გენში არქაული ნეანდერტალელის დნმ-ის კვალი ჰქონდა. მისი არსებობა ცხვირის სიმაღლის მატებას იწვევდა. გარდა ამისა, მკვლევრებმა აღმოაჩინეს, რომ გენის ეს რეგიონი ბუნებრივი გადარჩევის შედეგად ფორმირების ნიშნებს ავლენდა.
ეს აღმოჩენა მეორე შემთხვევაა, როდესაც Homo sapiens-ის გარდა სხვა არქაული ადამიანების დნმ-ის კვალი გავლენას ახდენს თანამედროვე ადამიანის სახის ფორმაზე. 2021 წელს მკვლევართა იმავე ჯგუფმა აჩვენა, რომ ტუჩების ფორმაზე მოქმედი გენი მემკვიდრეობით უძველესი დენიზოველებისგან იყო მიღებული.
