ლიეტუვა საფრანგეთისგან CAESAR-ის თვითმავალი ჰაუბიცების შეძენას გეგმავს. ამის შესახებ ლიეტუვის თავდაცვის მინისტრმა არვიდას ანუშაუსკასმა პარიზში Eurosatory 2022-ის შეიარაღების გამოფენის გახსნაზე ვიზიტის წინა დღეს განაცხადა, სადაც ის გერმანიის შეიარაღებული ძალების ახალ მინისტრთან, სებასტიან ლეკორნუსთან მოლაპარაკებებს გამართავდა.
„ჩვენ ვგეგმავთ სამხედრო პოტენციალის გაზრდაზე მსჯელობას. ასევე, ხელს მოვაწერ პირველ განზრახულობის წერილს 155 მმ-იანი CAESAR-ის თვითმავალი ჰაუბიცების შესაძენად“, - დაწერა ლიეტუველმა მინისტრმა Twitter-ზე.
თვითმავალი საარტილერიო დანადგარების რაოდენობა, რომელთა შეძენასაც ვილნიუსი საფრანგეთისგან გეგმავს, არ დაკონკრეტებულა.
ფრანგული CAESAR ჰაუბიცის პირველად დემონსტრირება 1994 წელს შედგა. უკრაინაში ომამდე საფრანგეთს 76 CAESAR ჰყავდა შეიარაღებაში, რომელთაგან ექვსი უკრაინას გადაეცა. CAESAR-ები ასევე გამოიყენება საუდის არაბეთის, დანიის, ინდონეზიის, ტაილანდის, ჩეხეთის რესპუბლიკის, მაროკოსა და ბელგიის შეიარაღებულ ძალებში.
CAESAR არის ფრანგული 155 მმ-იანი თვითმავალი საარტილერიო დანადგარი, რომელიც შექმნილია მტრის პირადი შემადგენლობისა და საარტილერიო ბატარეების განადგურებისთვის, ასევე ნაღმების ველებსა და დაბრკოლებებში უსაფრთხო გასასვლელების უზრუნველსაყოფად. საარტილერიო კომპონენტია 155 მმ-იანი ჰაუბიცა 52 კალიბრის ლულით. მაქსიმალური სროლის დიაპაზონი 42 კმ-ია. სროლის ტემპი წუთში ექვსი გასროლაა.
22 აპრილს, საფრანგეთის პრეზიდენტმა ემანუელ მაკრონმა განაცხადა, რომ საფრანგეთი უკრაინას Caesar-ის თვითმავალი ქვემეხებს გადასცემდა.
25 მაისს გენერალმა ვალერი ზალუჟნიმ განაცხადა, რომ „ცეზარის“ ტიპის ჰაუბიცები უკვე ფრონტის ხაზზე იმყოფებოდა.
30 მაისს, საფრანგეთის ახალი საგარეო საქმეთა მინისტრი, კატრინ კოლონა, უკრაინას ეწვია. მან შემდეგ განაცხადა, რომ საფრანგეთი უკრაინისთვის თვითმავალი ჰაუბიცების ახალი პარტიის მიწოდებას აპირებდა.
