ჩინეთში კორონავირუსის 13 ვაქცინის კლინიკური კვლევები მიმდინარეობს, რომელთაგან ოთხი მესამე ფაზაშია. ამის შესახებ დღეს, 20 ოქტომბერს, ჩინეთის სახალხო რესპუბლიკის მეცნიერებისა და ტექნოლოგიების სამინისტროს საზოგადოებრივი განვითარების ადმინისტრაციის დირექტორის მოადგილემ, ტიან ბაოგუომ განაცხადა.
„კლინიკურ კვლევებში უკვე 13 ვაქცინაა ჩართული, მათ შორის როგორც ინაქტივირებული ვაქცინები, ასევე ადენოვირუსის ვექტორზე დაფუძნებული ვაქცინები“, - თქვა მან.
ბაოგომ ხაზგასმით აღნიშნა, რომ ოთხი ვაქცინა მესამე ფაზის კლინიკურ კვლევებს გადის.
„დღემდე, კვლევის დაახლოებით 60 000 მონაწილე იქნა აცრილი. ჩვენ არ მიგვიღია სერიოზული გვერდითი რეაქციების შესახებ ინფორმაცია და პრეპარატებმა წინასწარი უსაფრთხოება აჩვენა“, - დასძინა მან.
როგორც ცნობილია, ჩინეთი შეუერთდა COVAX-ის საერთაშორისო მექანიზმს, რომელიც უზრუნველყოფს კორონავირუსის ვაქცინებზე თანაბარ წვდომას.
