უკრაინის პრეზიდენტმა ვოლოდიმირ ზელენსკიმ განაცხადა, რომ ქვეყნის ტერიტორიულ მთლიანობასა და სუვერენიტეტთან დაკავშირებით კომპრომისი არ შეიძლება. სახელმწიფოს მეთაურმა ხაზგასმით აღნიშნა რუსეთთან მოლაპარაკებების გაგრძელების მზადყოფნა.
„უკრაინა, რა თქმა უნდა, ერთგულია მოლაპარაკებების (რუსეთთან - რედ.) და გააგრძელებს მოლაპარაკებების პროცესს იმდენად, რამდენადაც ეს ჩვენზეა დამოკიდებული. ჩვენ შედეგებს ველით, მაგრამ ჩვენი ქვეყნისთვის რეალური უსაფრთხოება უნდა იყოს“, - განაცხადა ზელენსკიმ.
სახელმწიფოს მეთაურმა ხაზგასმით აღნიშნა, რომ რუსული ჯარები უნდა გავიდნენ ოკუპირებული ტერიტორიებიდან. ქვეყნის სუვერენიტეტი და ტერიტორიული მთლიანობა უნდა იყოს გარანტირებული.
„სუვერენიტეტსა და ტერიტორიულ მთლიანობასთან დაკავშირებით კომპრომისები არ შეიძლება და არც იქნება. ეს არის მკაფიო პრინციპები და შესაძლო შედეგის ხედვა“, - დასძინა უკრაინის პრეზიდენტმა.
ზელენსკიმ შეახსენა მათ, ვინც სოციალურ მედიაში გამოქვეყნებულ განცხადებებს ისე აღიქვამს, თითქოს ისინი უკვე ფაქტებია: უკრაინელები დემოკრატიულ სახელმწიფოში ცხოვრობენ და თავისუფლებისთვის იბრძვიან.
„ამიტომ, ნებისმიერი გადაწყვეტილება, რომელიც მნიშვნელოვანია მთელი ერისთვის (უკრაინის - რედ.) უნდა იქნას მიღებული არა ერთი ადამიანის ან რაიმე პოლიტიკური შეხედულების მქონე ადამიანთა ჯგუფის მიერ, არამედ მთელი ჩვენი ერის მიერ“, - ხაზი გაუსვა სახელმწიფოს მეთაურმა.
