პარიზის მახლობლად მასწავლებელ სამუელ პატის მკვლელობის შემდეგ, საფრანგეთში მცხოვრებ ჩეჩნებს სახლების ჩხრეკა და დაკავება დაეწყოთ. მათ ამის შესახებ Kavkaz.Realii-სთან ინტერვიუში განაცხადეს.
ევროპაში ჩეჩნების ასამბლეის წარმომადგენლის, შამილ ალბაკოვის თქმით, ორგანიზაციამ ბოლო დროს არაერთი შეტყობინება მიიღო ჩეჩნების „შეურაცხმყოფელი მკაცრი“ დაკავების შესახებ. „ჩხრეკა ძირითადად დილით ადრე ტარდება. ისინი კარებს ამტვრევენ, ყველაფერს თავდაყირა აყენებენ და ძალიან აგრესიულად იქცევიან“, - განმარტა მან.
ალბაკოვის თქმით, მსგავსი ზომები მიიღება, განსაკუთრებით საფრანგეთში, იმ პირების წინააღმდეგ, ვინც სოციალურ მედიაში რაიმე ფორმით დაუჭირა მხარი მასწავლებლის მკვლელობას. მსგავს საქმიანობაში ჩართულ პირებს დაპატიმრება, გამოძიება და სასამართლო პროცესი ემუქრებათ. წყარომ აღნიშნა, რომ ბრალდებულებს შესაძლოა თავისუფლების აღკვეთაც კი დაეკისროთ.
ჩეჩნური საზოგადოებრივი ორგანიზაციის „ბარტ მარშოს“ რელიგიური საკითხების ხელმძღვანელმა, საიდ-ახმად უსმანოვმა განმარტა, რომ საფრანგეთის ხელისუფლება პოტენციურად საშიში პირების სიებს აწარმოებს. უსაფრთხოების ძალები ამ სიებში შეყვანილ პირებს ყურადღებით აკვირდებიან. „რომელ ვებსაიტებს სტუმრობს ადამიანი, რა სიახლეებს კითხულობს, არის თუ არა ექსტრემისტულად მიჩნეული სოციალური მედიის ჯგუფების წევრი? მაშინაც კი, თუ ეს ადამიანი არაფერს წერს, შესაძლოა, რადიკალიზებულად ჩაითვალოს“, - განმარტა უსმანოვმა.
მან ასევე დაადასტურა, რომ პატის მკვლელობიდან ორი კვირის შემდეგაც კი, ის კვლავ იღებს ჩეჩნების ახალი დაპატიმრებების შესახებ ინფორმაციას, არა მხოლოდ პარიზში, არამედ ქვეყნის სხვა ქალაქებშიც. თუმცა, მან აღიარა, რომ საფრანგეთის ხელისუფლების მხრიდან ეთნიკური კუთვნილების საფუძველზე უკანონო დევნა არ დაფიქსირებულა.
ოქტომბრის ბოლოს, საფრანგეთში პრეზიდენტ ემანუელ მაკრონისა და მუსლიმური თემების კონფლიქტის ფონზე, შეიარაღებული თავდასხმების სერია მოხდა. კერძოდ, 29 ოქტომბერს, ნიცაში, ნოტრ-დამ-დე-ნისის ეკლესიაში, ტუნისელი იბრაჰიმ ალ-აუისაუის მიერ დანით თავდასხმა განხორციელდა. თავდასხმის შედეგად სამი ადამიანი დაიღუპა, რომელთაგან ორს ყელი გამოჭრეს. თავდამსხმელი პოლიციამ დაკავების დროს დაჭრა და საავადმყოფოში გადაიყვანეს. პასუხისმგებლობა აქამდე უცნობმა დაჯგუფებამ, „ალ-მაჰდი სამხრეთ ტუნისში“, აიღო.
თავდასხმა პარიზის გარეუბანში მასწავლებლის თავის მოკვეთიდან 13 დღის შემდეგ მოხდა. მასწავლებელი, სამუელ პატი, კოლეჯთან ახლოს ჩასაფრების შედეგად მოკლეს და თავი მოჰკვეთეს 18 წლის ჩეჩენმა აბდულახ ანზოროვმა, რომელიც მოგვიანებით პოლიციამ მოკლა. მკვლელობის მოტივი მასწავლებლის მიერ გაკვეთილზე წინასწარმეტყველ მუჰამედის კარიკატურების ჩვენება იყო.
საფრანგეთის პრეზიდენტმა მასწავლებლის მკვლელობას ტერორისტული თავდასხმა უწოდა. მაკრონმა განაცხადა, რომ პატი „ბავშვებისთვის სიტყვის თავისუფლების, რწმენის ან არრწმენის თავისუფლების სწავლებისთვის“ დაიღუპა. სახელმწიფოს მეთაურმა ასევე ისაუბრა „ისლამის კრიზისზე“.
