ოპოზიციის ლიდერმა ხაზგასმით აღნიშნა, რომ ახლა მან დანამდვილებით იცის, რომ სიყვარული კურნავს.
რუსმა ოპოზიციონერმა პოლიტიკოსმა ალექსეი ნავალნიმ კომიდან გამოსვლის შემდეგ პირველ მოგონებებზე ისაუბრა.
„ეს ნამდვილად არ არის „მოგონება“, არამედ პირველივე შეგრძნებებისა და ემოციების ერთობლიობაა“, - დაწერა მან თავის ინსტაგრამზე.
პოლიტიკოსმა თავის მიმდევრებს პირადი დეტალი გაუზიარა: აღმოჩნდა, რომ 26 აგვისტოს მისი და მისი მეუღლის, იულიას, ქორწინების 20 წლის იუბილე იყო.
„კომიდან უკვე გამომიყვანეს, მაგრამ ვერავის ვცნობ, ვერ ვხვდები რა ხდება. არ ვლაპარაკობ და არ ვიცი, რა ვთქვა. დროს მხოლოდ მის მოსვლას ველოდები. ვინ არის ის, გაურკვეველია. როგორ გამოიყურება - მეც არ ვიცი“, - ნათქვამია ნავალნის პოსტში.
მისი თქმით, მისი სტუმრად მოსული ცოლი უცვლელად ხდებოდა „პალატის უფროსი“, თუმცა ბოლომდე არ ესმოდა, რომ ეს ის იყო.
„ერთი წამითაც არ მეპარება ეჭვი, რომ ამას სამეცნიერო ახსნა აქვს. მაგალითად, ჩემი ცოლის ხმის ტემბრს ვისმენდი, ჩემი ტვინი დოფამინს გამოყოფდა და თავს უკეთ ვგრძნობდი. ყოველი ეიფორია ფაქტიურად თერაპიული იყო და მოლოდინი დოფამინით გამოწვეულ ჯილდოს ზრდიდა“, - აღნიშნა მან.
ოპოზიციის ლიდერმა ხაზგასმით აღნიშნა, რომ ახლა მან დანამდვილებით იცის, რომ სიყვარული კურნავს და მადლობა გადაუხადა მეუღლეს სიცოცხლისთვის.
7 სექტემბერს გერმანელმა ექიმებმა განაცხადეს, რომ რუსი ოპოზიციის ლიდერი კომიდან გამოვიდა. მისი ჯანმრთელობის მდგომარეობა მნიშვნელოვნად გაუმჯობესდა და მან გარშემომყოფების თხოვნებზე რეაგირება დაიწყო.
შეგახსენებთ, რომ ალექსეი ნავალნი 22 აგვისტოდან გერმანიაში მკურნალობას გადის. 20 აგვისტოს ის ტომსკიდან მოსკოვში მიმავალი თვითმფრინავის ბორტზე ცუდად გახდა.
