ევროკავშირი შეძლებს რუსულ ნავთობზე ემბარგოს დაწესებაზე შეთანხმების მიღწევას. ამის შესახებ ევროკავშირის საგარეო საქმეთა მინისტრმა, ხოსეპ ბორელმა, გერმანიაში, G7-ის საგარეო საქმეთა მინისტრების შეხვედრაზე ჩასვლისთანავე განაცხადა.
მან აღნიშნა, რომ ქვეყნებს, რომლებიც ეწინააღმდეგებიან რუსული საწვავის გამოყენებაზე დაუყოვნებლივ უარის თქმას, „ობიექტური სირთულეები“ აქვთ ალტერნატიული მიმწოდებლის პოვნაში.
ბორელმა ასევე გამოაცხადა კიევისთვის ფინანსური დახმარების გაზრდა.
„მინდა განვაცხადო, რომ ევროკავშირი უკრაინას სამხედრო დახმარების სახით დამატებით 500 მილიონი ევროს ოდენობის ახალ ტრანშს გამოუყოფს. ეს 500 მილიონი ევრო მძიმე შეიარაღებისთვის იქნება გამოყოფილი. ჯერჯერობით, ჩვენ მივაწოდეთ ჯავშანტექნიკა, ტანკები, მძიმე არტილერია, საბრძოლო მასალა...“ - ჟოზეპ ბორელი, ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში.
„დიდი შვიდეულის“ მინისტერიალს ასევე ესწრებოდნენ უკრაინისა და მოლდოვას საგარეო საქმეთა მინისტრები, დმიტრო კულება და ნიკოლაი პოპესკუ.
დიდი ბრიტანეთის საგარეო საქმეთა მინისტრმა ლიზ ტრასმა აღნიშნა, რომ ევროპის მიზანია ვლადიმერ პუტინზე ზეწოლის გაგრძელება უკრაინის სამხედრო მხარდაჭერისა და რუსეთის წინააღმდეგ ახალი სანქციების გზით.
მარტის დასაწყისიდან ევროკავშირმა კიევს 4 მილიარდი ევროს ოდენობის დახმარება გამოუყო, ხოლო დიდმა ბრიტანეთმა დაახლოებით 3.5 მილიარდი ევრო.
