კრემლთან დაკავშირებული ოლიგარქები ისკანდერ მახმუდოვი და ანდრეი ბოკარევი ლატვიაში აქტიურად აწარმოებენ ბიზნეს საქმიანობას, აკონტროლებენ რიგაში არსებულ კომპანიებს როგორც პირადად, ასევე მათი წარმომადგენლების მეშვეობით და იღებენ დაფინანსებას ევროკავშირის გრანტების სახით.
ამის შესახებ პორტალი The Insider-ის მიერ ჩატარებულ გამოძიებაშია ნათქვამი, იტყობინება European Pravda.
2021 წლის მონაცემებით, მახმუდოვი და ბოკარევი აკონტროლებენ რიგის ელექტრომანქანათმშენებლობის ქარხანას (RER), მსხვილ ლატვიურ კომპანიას, რომელიც აწარმოებს ელექტრომოწყობილობებს მატარებლებისთვის, მეტროს ვაგონებსა და ქალაქის საზოგადოებრივი ტრანსპორტისთვის.
ლატვიის კომერციული რეესტრის მონაცემებით, 2021 წლის მდგომარეობით, RER-ის აქციების 36%-ს რუსული იურიდიული პირი TransComponent Holding აკონტროლებდა. კრემლის ოლიგარქები, იურიდიული პირების ჯაჭვის მეშვეობით, თითოეულს 20% ეკუთვნის, კიდევ 46% მოსკოვში დაფუძნებული Krona Grup-ის საკუთრებაა, რომელსაც ისინიც აკონტროლებენ, ხოლო დანარჩენი მახმუდოვთან და ბოკარევთან დაკავშირებულ პარტნიორებს შორის იყოფა.
რუსი ოლიგარქების მიერ კონტროლირებადი ლატვიური კომპანია მთელ ევროპაში ოპერირებს: მაგალითად, მაისში მან ჩეხეთის რესპუბლიკაში ტროლეიბუსებისა და ელექტროავტობუსებისთვის ახალი ელექტროძრავა წარადგინა. გარდა ამისა, RER ევროკავშირისგან დაფინანსებას ლატვიის საინვესტიციო და განვითარების სააგენტოსა და ლატვიის ეკონომიკის სამინისტროს მიერ გაცემული გრანტების მეშვეობით იღებს.
როგორც The Insider აღნიშნავს, რუსეთში ოლიგარქები ფლობენ კომპანიებს, რომლებიც რუსეთის თავდაცვის სამინისტროს ამარაგებენ. მათ ადრე წილები ჰქონდათ კალაშნიკოვის შეიარაღების კონცერნში და ახლა, კოლომენსკის ქარხნის მეშვეობით, ისინი აგრძელებენ რუსული სამხედრო გემებისთვის დიზელის ძრავების მიწოდებას.
ლატვიის ხელისუფლება ბოკარევს და მახმუდოვს ეროვნული უსაფრთხოებისთვის საფრთხედ არ მიიჩნევს, მიუხედავად იმისა, რომ ისინი რუსეთის არმიის მომწოდებლები არიან.
მახმუდოვი და ბოკარევი რამდენიმე სისხლის სამართლის საქმეში იყვნენ ჩართულნი, როგორც მეწარმეები, რომელთა მეშვეობითაც კრიმინალური ფული ითეთრებოდა.
ბოკარევისა და მახმუდოვის საქმიანი კავშირები ბალტიისპირეთის ყველა ქვეყანას მოიცავდა. ლიეტუვისა და ლატვიის გარდა, ისინი ასევე იყვნენ ესტონეთის ერთ-ერთი უმდიდრესი ქალის, ტატიანა ლიქსუტოვას, მოსკოვის მერის მოადგილის, მაქსიმ ლიქსუტოვის ყოფილი მეუღლის, დიდი ხნის პარტნიორები.
