კორონავირუსის კრიზისმა მნიშვნელოვნად შეცვალა ევროპაში გადაადგილების თავისუფლების კონცეფცია. ინფექციის გავრცელების კვალდაკვალ, ზოგიერთი ქვეყნის მთავრობებმა მიიღეს პროტექციონისტული ზომები და ჩაკეტეს საზღვრები. ეპიდემიოლოგიური სიტუაციის გაუმჯობესების კვალდაკვალ, საზღვრები ხელახლა იხსნება, მაგრამ რას ფიქრობენ ევროპელები ამის შესახებ? Euronews-მა, კვლევით ფირმა Redfield-თან და Wilton Strategies-თან პარტნიორობით, რამდენიმე ქვეყანაში ჩაატარა გამოკითხვა.
აღმოჩნდა, რომ გერმანიისა და სხვა ქვეყნების მაცხოვრებლების შეხედულებებს შორის მნიშვნელოვანი განსხვავებაა. მიუხედავად იმისა, რომ იტალიაში, საფრანგეთსა და ესპანეთში გამოკითხულთა უმრავლესობა საზღვრების დაკეტვას ამჯობინებს, გერმანიაში, სადაც COVID-19-ით გარდაცვლილთა რიცხვი მნიშვნელოვნად დაბალია, გამოკითხულთა ნახევარზე მეტი გადაადგილების თავისუფლებას უჭერს მხარს.
ამავდროულად, გერმანიაში გამოკითხულთა 56% მიიჩნევს, რომ ევროპის სამხრეთით მოგზაურობა კვლავ სახიფათოა, ხოლო საფრანგეთსა და ესპანეთში 10-დან 6 გამოკითხული ფიქრობს, რომ ჩრდილოეთ ევროპის მაცხოვრებლებისთვის სამხრეთით მოგზაურობა კვლავ სარისკოა.
ეს ცუდი ამბავია ხმელთაშუა ზღვის ქვეყნების ტურიზმის სექტორისთვის, რომლებიც იმედებს ამყარებდნენ ზაფხულის არდადეგების სეზონზე, რათა ლოკდაუნის შემდეგ ეკონომიკის აღდგენაში დახმარებოდნენ.
პანდემიამდე გერმანიაში გამოკითხულთა 40%-ზე მეტი საზღვარგარეთ დასვენებას გეგმავდა, იტალიაში, საფრანგეთსა და ესპანეთში კი რესპონდენტები ძირითადად სახლში დარჩენას ელოდნენ. თუმცა, ახლა ყველაფერი შეიცვალა. გერმანიაში გამოკითხულთა 61%-ს მოგზაურობა არ აქვს დაგეგმილი, ესპანეთში კი ეს მაჩვენებელი 60%-ია. იტალიასა და საფრანგეთში მეტი რესპონდენტია რისკის გასაწევად მზად, თუმცა ამ ქვეყნებშიც კი გამოკითხულთა ნახევარზე მეტმა საზღვარგარეთ მოგზაურობაზე უარი თქვა.
ევროპაში ლოქდაუნის შეზღუდვების შემსუბუქება სადღესასწაულო სეზონის დაწყებას დაემთხვა, თუმცა სიტუაცია ნორმალურად დაბრუნებისგან შორს არის. ამასობაში, კორონავირუსის მეორე ტალღის საფრთხე იმას ნიშნავს, რომ ევროპაში მოგზაურობა კვლავ სარისკოა.
