ესტონეთი ევროკავშირის დონეზე რუსებისთვის შენგენის ვიზების აკრძალვას შეეცდება. ქვეყნის საგარეო საქმეთა სამინისტრო ამასთან დაკავშირებით წინადადებას ამზადებს.
ამის შესახებ ETV-ის ეთერში ახლადდანიშნულმა საგარეო საქმეთა მინისტრმა ურმას რეინსალუმ განაცხადა. მან აღნიშნა, რომ ზოგიერთ შემთხვევაში, რუსეთის მოქალაქეებისთვის გამონაკლისები უნდა დაუშვან.
რეინსალუს თქმით, არსებობს „ჰუმანიტარული შემთხვევები“, როგორიცაა რუსი ოპოზიციის ლიდერისა და პოლიტპატიმარი ალექსეი ნავალნის თანამოაზრეებისთვის ვიზების გაცემა, რომლებიც ცალკე უნდა განიხილებოდეს
„მაგრამ ნამდვილად ირონიულია, რომ რუსეთის მოქალაქეები ახლა მასობრივად გადაკვეთენ რუსეთის დასავლეთ საზღვარს — ფინეთის, ლატვიისა და ლიტვის გავლით — ამ ზაფხულს ლუვრის სანახავად, მაშინ როცა უკრაინაში ბავშვებს კლავენ. ეს, რა თქმა უნდა, მორალურად არასწორია“, — განმარტა ესტონეთის საგარეო საქმეთა მინისტრმა.
რეინსალუმ დასძინა, რომ ესტონეთმა უნდა შეაფასოს, გააუქმოს თუ არა არსებული ვიზები. საკითხი ევროკავშირში მარტში უკვე განიხილეს, თუმცა იმ დროს რუსეთში საკარანტინო შეზღუდვები მოქმედებდა და მოგზაურობა ისეთი ფართოდ გავრცელებული არ იყო, როგორც ახლაა.
რეინსალუმ განაცხადა, რომ ესტონეთის საგარეო საქმეთა სამინისტრო ევროკავშირისთვის წინადადებების მომზადებას უახლოეს კვირებში გეგმავს. ინიციატივა უკვე გააცნეს ფინეთისა და ლატვიის საგარეო საქმეთა მინისტრებს.
„ჩვენ გვჭირდება, რომ ყველა ქვეყანა მხარს დაუჭერდეს. ჩვენ ამ საკითხს ახალი მიმართულებით მივუდგებით და მე ამ მხარდაჭერის იმედი მაქვს. ახლა სიტუაცია განსხვავდება იმისგან, რაც გაზაფხულზე იყო“, - განაცხადა მინისტრმა.
