პატარა მისაბმელი მხოლოდ 190 კილოგრამს იწონის.
რუსეთში Tesla Cybertruck-ის ელექტრო პიკაპის კიდევ ერთი რეპლიკა გამოჩნდა და შესაძლოა, დღემდე ერთ-ერთი ყველაზე ფუნქციონალური. Tesla-თი შთაგონებულმა რუსმა ივან ჟელტონოგოვმა პატარა სახლი შექმნა ბორბლებზე, რომელშიც ოჯახური მოგზაურობისთვის საჭირო ყველაფრის განთავსება სცადა.
რეპლიკა წარმოადგენს მისაბმელს, რომელსაც დამოუკიდებლად გადაადგილება არ შეუძლია. ხელნაკეთი კემპერი, რომლის მართვაც მხოლოდ ჩაჯდომით არის შესაძლებელი, მხოლოდ 190 კილოგრამს იწონის და სამსულიანი ოჯახისთვისაა განკუთვნილი: ორი ზრდასრული და ერთი ბავშვი.
კემპერ-მისაბმელში შესვლა მარჯვენა მხარეს მდებარე პატარა კარიდან შეიძლება. შესვლისთანავე საშხაპე უჯრაა: შხაპის მისაღებად, უბრალოდ ჩამოწიეთ მაგნიტური ფარდა, რომელიც კედლებს წყლის შხეფებისგან იცავს. იმავე სივრცეში, ქსოვილის ფარდით გამოყოფილ სივრცეში, დიზაინერმა გადაწყვიტა, სამზარეულოს ზონა სათავსო უჯრებით, ნიჟარით გამოსაწევი ონკანით (რომელიც ასევე შხაპის თავის ფუნქციასაც ასრულებს) და კომპოსტირების უნიტაზით განეთავსებინა.
ულტრაკომპაქტური კემპერის მეორე „ოთახში“ განთავსებულია ტრანსფორმირებადი მაგიდა, რომლის დივნის ბალიშების გამოყენებით საწოლად გადაკეთებაც შესაძლებელია. კედლებზე ჯიბეები და კაუჭებია, სავენტილაციო ხვრელები და სმარტფონის სოკეტებია. ჟელტონოგოვის თქმით, პანორამული სახურავისა და მრავალი ფანჯრის მიუხედავად, კემპერი ზამთარშიც კი თბილი დარჩება ხუთკილოვატიანი გამათბობლის წყალობით.
ავტოფურგონი ასევე აღჭურვილია 100 ლიტრიანი წყლის ავზით, მზის პანელებით, LED ოპტიკით და რეგულირებადი ინტერიერის განათებით.
Tesla-ს ნამდვილი Cybertruck ჯერ არ გამოსულა — ის ასაწყობ ხაზზე მომავალ წლამდე არ გამოვა — თუმცა, ამ ეტაპზე, ამერიკული ბრენდის თაყვანისმცემლები ხელნაკეთი რეპლიკებით კმაყოფილდებიან. ყველაზე საკამათო ეგზემპლარებმაც კი იპოვეს მყიდველები: გასულ კვირას, 2000 წლის ავარიული Toyota Yaris ჰეჩბეკის Cybertruck-ის რეპლიკა, მისი დახრილი კორპუსის მიუხედავად, 999 დოლარად გაიყიდა.
