ესპანეთში, ვალენსიასთან ახლოს, კულერაში, მედუზას ფესტივალზე სცენის ჩამონგრევის შედეგად, სულ მცირე ერთი ადამიანი დაიღუპა და 40 დაშავდა. გარდაცვლილი 22 წლის იყო.
ესპანური გამოცემა ABC España იუწყება, რომ ქარმა სცენის ნაწილი და ფესტივალის შესასვლელი წააქცია (ფოტოებისა და ვიდეოების სანახავად გადადით გვერდის ბოლოში).
როგორც ფესტივალის ზოგიერთმა დამსწრემ გამოცემას განუცხადა, დილის ოთხ საათზე მოულოდნელად ქვიშის ქარიშხალი ამოვარდა, რამაც ქაოსი გამოიწვია: ათასობით ადამიანი გაიქცა და თავშესაფარი ეძებდა ძლიერი ქარისა და მფრინავი საგნებისგან, როგორიცაა ღობეები და მთავარი შესასვლელი ნიშანი.
„ეროვნული მეტეოროლოგიური სააგენტოს ცნობით, შაბათს დილით დაფიქსირდა ცხელი ქარი ძალიან ძლიერი ნაკადებით და ტემპერატურის მკვეთრი მატებით. ქალაქ კულერაში ტემპერატურა სულ რამდენიმე წუთში 29-დან 38 გრადუს ცელსიუსამდე გაიზარდა, ხოლო ფარდობითი ტენიანობა 18%-ზე დაბლა დაეცა“, - იუწყება ABC España.
ფესტივალის ორგანიზატორებმა გამოცემას დაუდასტურეს, რომ ფესტივალის აქტივობები უამინდობის გამო დროებით შეჩერებულია, თუმცა კემპინგი ღია რჩება.
სამწლიანი პაუზის შემდეგ დაბრუნებული მედუზას ფესტივალი კვირა დღისთვის 320 000-ზე მეტ ადამიანს მიიზიდავდა და ესპანეთში ყველაზე მასშტაბურ მუსიკალურ ღონისძიებად ითვლებოდა.
