ევროპაში ისტორიკოსებმა და ხელოვნური ინტელექტის ექსპერტებმა გამოაცხადეს „ოდეუროპას“ ბიბლიოთეკის შექმნის პროექტი, რომელშიც წარმოდგენილი იქნება XVI-XX საუკუნეების სხვადასხვა სურნელი, იტყობინება The Guardian
პროექტის ბიუჯეტი 3.7 მილიონი აშშ დოლარია. ის სამი წლის განმავლობაში გაგრძელდება, სამუშაოების დაწყება კი იანვარში იგეგმება.
„თუ 1500 წლიდან ევროპაში გამოქვეყნებულ ტექსტებს გადახედავთ, უამრავ მითითებას აღმოაჩენთ ყველანაირი სურნელის შესახებ, დაწყებული რელიგიური სურნელებიდან, როგორიცაა საკმეველი, დამთავრებული თამბაქოთი“, - თქვა კემბრიჯის უნივერსიტეტის წარმომადგენელმა უილიამ ტალეტმა, Odeuropa-ს გუნდის წევრმა.
დასაწყისისთვის, ექსპერტები გეგმავენ პროგრამების დაწერას, რომლებიც შვიდ ენაზე მოძებნიან ისტორიულ ტექსტებს არომატების აღწერილობების, კონტექსტის და შესაძლო ილუსტრაციებისთვის.
შეგროვებული ინფორმაცია შემდეგ გამოყენებული იქნება ევროპული სურნელების ონლაინ ენციკლოპედიის შესაქმნელად, მათ შორის იმ ემოციებისა და ადგილების მითითებების ჩათვლით, რომლებთანაც ისინი ასოცირდება.
ტალეტმა ხაზგასმით აღნიშნა, რომ ამ პროექტისთვის უმნიშვნელოვანესი იყო იმის გაგება, თუ როგორ შეიცვალა გარკვეული სურნელების მნიშვნელობა და გამოყენება დროთა განმავლობაში.
ექსპერტები ასევე გეგმავენ ქიმიკოსებთან და პარფიუმერებთან თანამშრომლობას წარსულის სურნელების ხელახლა შესაქმნელად და მოგვიანებით მუზეუმებში მათი გამოყენების მიზნით.
პროექტის დეტალები ვებსაიტზე.
