უკრაინის საზღვაო ძალების პრესსამსახურის ცნობით, დროებით ოკუპირებული ქალაქ ბერდიანსკის პორტში რუსული დიდი სადესანტო ხომალდი „ორსკი“ განადგურდა.
უკრაინის საზღვაო ძალებმა გამოაქვეყნა ცეცხლმოკიდებული გემის ფოტოები და ვიდეოები, რომლებშიც ისმოდა საბრძოლო მასალის აფეთქების ხმა.
რუსული მედიის ცნობით, რუსეთის შავი ზღვის ფლოტის გემი „ორსკი“ 21 მარტს ბერდიანსკში შევიდა, რათა რუსი ოკუპანტებისთვის სამხედრო ტექნიკა, კერძოდ, ჯავშანტრანსპორტიორები მიეწოდებინა. სულ, რუსული მედიის ცნობით, უკრაინის წინააღმდეგ ომში 10 დიდი რუსული სადესანტო გემია ჩართული.
ზაპოროჟიეს ოლქის სახელმწიფო ადმინისტრაციის ანგარიშის თანახმად, უკრაინის შეიარაღებულმა ძალებმა გაანადგურეს საოკუპაციო არმიის კუთვნილი დიდი სადესანტო ხომალდი „ორსკი“ და დააზიანეს კიდევ ორი გემი. განადგურდა 3000 ტონიანი საწვავის ავზი. ხანძარი მტრის საბრძოლო მასალის საწყობსაც გადაედო. საოკუპაციო ძალებისთვის მიყენებული ზიანის დეტალები ზუსტდება.
