მტერი კიევისა და ჩერნიგოვის ოლქებიდან რამდენიმე ქვედანაყოფს გაჰყავს და ძალისხმევას სლობოჟანსკისა და დონეცკის სექტორებზე ამახვილებს, - ამის შესახებ უკრაინის შეიარაღებული ძალების გენერალური შტაბის ბოლო ანგარიშშია ნათქვამი.
მტერი აგრძელებს ჩერნიგოვის ბლოკადას და სამოქალაქო და სამხედრო ობიექტების დაბომბვას. კიევის ოლქის ბროვარის მიმართულებით მტერი ცდილობს შეინარჩუნოს ადრე დაკავებული პოზიციები და ხელი შეუშალოს უკრაინული ძალების შემდგომ წინსვლას.
სლობოჟანსკის მიმართულებით მტერი აგრძელებს ხარკოვის ბლოკადას, სუმის ოლქიდან უკრაინის ტერიტორიის გარეთ გაიყვანა პირველი სატანკო არმიის ზოგიერთი დანაყოფი და განაგრძო ჯარების გადაჯგუფება სხვა რაიონებში გადასაადგილებლად. ასევე გააძლიერა შეტევა სლავიანსკის მიმართულებით.
რუსეთის საწყობებიდან საბრძოლო და სპეციალური დანიშნულების ტექნიკის გატანა გრძელდება. გენერალური შტაბის მონაცემებით, ამ ტექნიკის 40% გაუმართავია.
გენერალურმა შტაბმა ასევე აღნიშნა, რომ რუსეთი ჩერნობილის ზონაში საბრძოლო მასალის ტრანსპორტირებას და შენახვას აგრძელებს, მიუხედავად იმისა, რომ ოკუპანტების ოფიციალური განცხადებები ამას უარყოფს. გენერალური შტაბი ამ საბრძოლო მასალის აფეთქების მაღალ რისკზე მიუთითებს.
