Wikimedia.ru-მ, ორგანიზაციამ, რომელიც ვიკიპედიის რუსულენოვან ვერსიას მართავს, რუსეთში დახურვის შესახებ განაცხადა. ამის შესახებ მისმა აღმასრულებელმა დირექტორმა, სტანისლავ კოზლოვსკიმ, TASS-ს განუცხადა.
„გუშინ გადავწყვიტეთ Wikimedia.ru-ს დახურვა. ჩვენ ვამზადებთ ორგანიზაციის ლიკვიდაციის დოკუმენტებს, რომელიც 15 წელია ფუნქციონირებს“, - თქვა კოზლოვსკიმ.
მისი თქმით, ეს გადაწყვეტილება იმით არის განპირობებული, რომ სავარაუდოდ, მომავალ პარასკევს მისი უცხოელ აგენტად გამოცხადება იგეგმება. ეს მოსკოვის სახელმწიფო უნივერსიტეტის რექტორის ადმინისტრაციის მიერ მიღებული ინფორმაციით გამოვლინდა, სადაც კოზლოვსკი დაახლოებით 25 წლის განმავლობაში მუშაობდა.
„გუშინდელი დღიდან მე აღარ ვარ მოსკოვის სახელმწიფო უნივერსიტეტის თანამშრომელი“, - განმარტა მან.
კოზლოვსკიმ გაიხსენა, რომ Wikimedia.ru პირდაპირ არ მართავდა ვიკიპედიას — ეს ენციკლოპედიის ავტორთა საზოგადოების პასუხისმგებლობა იყო. ორგანიზაციის მისია იყო რუსეთში ვიკი პროექტების მხარდაჭერა, მათ შორის სახელმძღვანელოებისა და კურსების მომზადება, კონფერენციების ორგანიზება და ვიკიპედიელებისთვის სხვა ღონისძიებების ჩატარება.
მან იმედი გამოთქვა, რომ ვიკიპედია კვლავაც იარსებებს და რუსეთში არ დაიბლოკება. „ხალხი მის დაბლოკვაზე 10 წელზე მეტია საუბრობს და ტექნიკურად ეს ნებისმიერ დღეს შეიძლება მოხდეს, მაგრამ არასდროს ხდება. იმედი მაქვს, რომ ეს არასდროს მოხდება“, - დაასკვნა მან.
