ხუთშაბათს, 26 მაისს, მოლდოვას დედაქალაქ კიშინიოვის სასამართლომ ყოფილ პრეზიდენტ იგორ დოდონს 30-დღიანი შინაპატიმრობა შეუფარდა. ის ქვეყნიდან გაქცევას აპირებდა და ბილეთიც კი შეიძინა.
ამის შესახებ deschide.md-ის ცნობით, ანტიკორუფციულმა პროკურორმა პეტრუ იარმალიუკმა განაცხადა. ამგვარად, სასამართლომ ნაწილობრივ დააკმაყოფილა პროკურორების მოთხოვნა დოდონის 30-დღიანი წინასწარი პატიმრობის შესახებ.
სახელმწიფო პროკურორმა განაცხადა, რომ მან წარმოადგინა მტკიცებულებების მთელი რიგი, რომლებიც, მისი აზრით, წარმოადგენს სამართლებრივ საფუძველს და ადასტურებს ბრალდებულის პასუხისმგებლობისგან თავის არიდების რისკებს.
„დღეს დოდონი დილის 9:00 საათზე ქვეყნიდან გასვლას გეგმავდა. აღმოჩენილი იქნა დიდი რაოდენობით უცხოური ვალუტა, რაც მიუთითებს, რომ ის მოლდოვას რესპუბლიკის დატოვებას აპირებდა“, - ხაზგასმით აღნიშნა იარმალიუკმა.
აღსანიშნავია, რომ უფრო ადრე, 24 მაისს, ანტიკორუფციული პროკურორები, სპეციალური ინსპექტორისა და ეროვნული ანტიკორუფციული ცენტრის თანამშრომლებთან ერთად, იგორ დოდონის სახლში ჩხრეკას ატარებდნენ. მათ სხვადასხვა ვალუტაში დიდი რაოდენობით თანხა აღმოაჩინეს. ასევე ნაპოვნია ფუფუნების ნივთები და ქვითრები, რაც იმაზე მიუთითებს, რომ ოჯახი ფუფუნებით ცხოვრობდა. ყოფილი პრეზიდენტის სახლის ჩხრეკა დაახლოებით 12 საათს გაგრძელდა.
თავად დოდონმა უკვე უპასუხა მის წინააღმდეგ ფუფუნების ნივთებისა და ნაღდი ფულის აღმოჩენის შესახებ გავრცელებულ ინფორმაციას. ყოფილი პრეზიდენტი აცხადებს, რომ მის წინააღმდეგ წაყენებული ბრალდებები „პოლიტიკურად მოტივირებული საქმეა“ და რომ „სამართლიანი და პოლიტიკურად უკონტროლო სასამართლო პროცესი მის სიმართლეს დაამტკიცებს“.
დოდონი ეჭვმიტანილია პასიურ კორუფციაში, უკანონო გამდიდრებაში, ღალატსა და კრიმინალური ორგანიზაციის მიერ პოლიტიკური პარტიის დაფინანსებაში.
მოლდოვას ყოფილი პრეზიდენტი იგორ დოდონი, რომელიც ცნობილია რუს დიქტატორ ვლადიმერ პუტინთან ახლო კავშირებით, სამშაბათს 72 საათით დააკავეს მას შემდეგ, რაც ანტიკორუფციულმა პროკურორებმა ჩხრეკა ჩაატარეს მის სახლში კიშინიოვში და მის გარემოცვასთან დაკავშირებულ სხვა ადგილებში.
