რუსეთის ფინანსთა სამინისტრომ დახურა მონაცემები ფედერალური ბიუჯეტის სხვადასხვა პუნქტის ხარჯების შესახებ და განაცხადა, რომ ეს ხელს შეუწყობს დამატებითი სანქციების რისკის მინიმიზაციას.
ამის შესახებ გამოცემა „ბელი“ წერს.
ასეთი მონაცემები ადრე ყოველთვიურად ქვეყნდებოდა. თუმცა, სამინისტროს მიერ 2022 წლის იანვარ-მაისის ბიუჯეტის შესრულების შესახებ 14 ივნისს გამოქვეყნებულ ანგარიშში მხოლოდ ხარჯებისა და შემოსავლების ჯამური მაჩვენებლები იყო მოცემული.
„აშშ-ს, ევროკავშირის, დიდი ბრიტანეთის და სხვა არამეგობრული სახელმწიფოების მხრიდან რუსეთის ფედერაციასა და ფიზიკურ პირებზე ზეწოლის გამო, აუცილებელი გახდა ინფორმაციის გავრცელების ნაწილობრივი შეზღუდვა, მათ შორის ბიუჯეტის ანგარიშგების შესახებ. ეს ხელს შეუწყობს დამატებითი სანქციების რისკის მინიმიზაციას“, - ნათქვამია სააგენტოს განცხადებაში.
გამოცემა აღნიშნავს, რომ რუსეთის ფინანსთა სამინისტროს მიერ აპრილის თვის წინა სტატისტიკამ, კერძოდ, სამხედრო ბიუჯეტის ხარჯების 130%-იანი ზრდა გამოავლინა.
