ბელარუსის პარლამენტში დარეგისტრირდა კანონპროექტი, რომელიც ითვალისწინებს ქვეყნის კაგებეს ექვს თვემდე ვადით მოგზაურობის უფლების შეზღუდვის უფლებამოსილების მინიჭებას, თუ ეს „ეწინააღმდეგება ეროვნული უსაფრთხოების ინტერესებს“.
ამის შესახებ ინფორმაციას გამოცემა „ევროპული პრავდა“ Reform.by-ზე დაყრდნობით ავრცელებს.
დოკუმენტი გვთავაზობს შესვლისა და გასვლის პროცედურების შესახებ კანონში დებულებების დამატებას, რომლის მიხედვითაც, კგბ-ს უფლება ექნება შეზღუდოს მოქალაქეების გასვლა ექვს თვემდე ვადით, თუ მათი გამგზავრება „ეწინააღმდეგება ბელორუსის რესპუბლიკის ეროვნული უსაფრთხოების ინტერესებს“.
კანონის ამჟამინდელი ვერსია შეიცავს მითითებას ეროვნული უსაფრთხოების მიზნით მოგზაურობის აკრძალვაზე (მუხლი 3), თუმცა არ აკონკრეტებს, თუ ვის შეუძლია ამ დებულების გამოყენება და ის სხვაგან არსად არის ნახსენები.
კანონპროექტი ასევე ითვალისწინებს ბელორუსიის ტერიტორიიდან გასვლის აკრძალვას იმ მოქალაქეებისთვის, „რომლებიც საზოგადოებრივი წესრიგის დარღვევის ადმინისტრაციული სამართალდარღვევების ჩადენისთვის ადმინისტრაციულ წარმოებაში იმყოფებიან“.
გარდა ამისა, შემოთავაზებულია, რომ მოქალაქეების გარკვეულ კატეგორიებს - სამხედრო პერსონალს, სამხედრო ფორმირებების სამოქალაქო თანამშრომლებს და საჯარო მოხელეებს - საზღვარგარეთ გამგზავრების უფლება მხოლოდ მათი უფროსების თანხმობით მიეცეთ.
როგორც Reform.by აღნიშნავს, კანონპროექტს, სავარაუდოდ, თვითგამოცხადებული პრეზიდენტი ალექსანდრე ლუკაშენკო განიხილავს და ხელს მოაწერს ამ შემოდგომაზე.
შეგახსენებთ, რომ ლუკაშენკომ სახელმწიფო უშიშროების კომიტეტის ფუნქციების გაფართოების აუცილებლობაზე ადრე განაცხადა.
