რუსმა მილიარდერებმა კორონავირუსის პანდემიის წელს მაინც მოახერხეს საკუთარი ქონების გაზრდა — მათი ჯამური ქონება 2020 წელს 13.8 მილიარდი დოლარით გაიზარდა. „რია ნოვოსტის“ Bloomberg-ის მილიარდერების ინდექსზე (BBI) დაფუძნებული გათვლების მიხედვით, ყველაზე დიდი მოგება დაღესტნელი ბიზნესმენი და სენატორი სულეიმან კერიმოვი და ალიშერ უსმანოვი („მეტალოინვესტი“, „მეგაფონი“) გამოიმუშავეს.
ინდექსი გამოითვლება იმ კომპანიების აქციების ფასების საფუძველზე, რომლებშიც მილიარდერებს აქვთ წილები. ზოგიერთი კომპანიისთვის გაანგარიშება ეფუძნება ბაზრის კაპიტალიზაციის EBITDA-სთან ან აქციის ფასის თანაფარდობას ერთ აქციაზე შემოსავალთან. BBI-ის რეიტინგი მოიცავს მსოფლიოს 500 უმდიდრეს ადამიანს. ამჟამად მასში 22 რუსია.
გარდა ამისა, Bloomberg-ის მონაცემებით, 2019 წელს უმდიდრესი რუსების ერთობლივი სიმდიდრე ბოლო ოთხი წლის განმავლობაში ყველაზე სწრაფი ტემპით - 52.9 მილიარდი დოლარით გაიზარდა.
„ნორილსკ ნიკელის“ ერთ-ერთი მთავარი აქციონერის, ვლადიმერ პოტანინის ქონება 2020 წელს 1.98 მილიარდი დოლარით გაიზარდა და 30 მილიარდ დოლარს მიაღწია. ის BBI-ის სიაში ყველაზე მდიდარი რუსი რჩება. მეორე ადგილზეა „ნოვატეკის“ აღმასრულებელი დირექტორი ლეონიდ მიხელსონი, რომლის წმინდა ქონებაც წლის განმავლობაში 219 მილიონი დოლარით გაიზარდა და 24.8 მილიარდ დოლარს მიაღწია. მესამე ადგილზეა „ნლმკ“-ის მთავარი ბენეფიციარი, ვლადიმერ ლისინი, რომლის ქონებაც 2.47 მილიარდი დოლარით გაიზარდა და 23.9 მილიარდ დოლარს მიაღწია.
„სევერსტალის“ მთავარი მფლობელი, ალექსეი მორდაშოვი, მეოთხე ადგილზე გავიდა. მისი ქონება 3.11 მილიარდი დოლარით გაიზარდა და 23.1 მილიარდ დოლარს მიაღწია. მეხუთე ადგილზე ალიშერ უსმანოვი გავიდა, რომლის ქონებაც 4.46 მილიარდი დოლარით გაიზარდა და 21.1 მილიარდ დოლარს მიაღწია.
რომან აბრამოვიჩმა (ევრაზი) წლის ბოლოს მეექვსე ადგილი დაიკავა, მისი წმინდა ქონება 2020 წელს 2.06 მილიარდი დოლარით გაიზარდა და 18.4 მილიარდ დოლარს მიაღწია. EuroChem-ისა და SUEK-ის ბენეფიციარი ანდრეი მელნიჩენკო მეშვიდე ადგილზე გავიდა, მისი ქონება 2.72 მილიარდი დოლარით გაიზარდა და 18.1 მილიარდ დოლარს მიაღწია.
ამასობაში, „ლუკოილის“ თანამფლობელის, ვაგიტ ალეკპეროვის, ქონება, რომელიც მერვე ადგილზე იყო, წლის განმავლობაში 4.99 მილიარდი დოლარით შემცირდა, რაც BBI-ის რეიტინგის რუსულ ნაწილში ყველაზე დიდი დანაკარგია. ალეკპეროვის წმინდა ქონება წლის ბოლოს 17.3 მილიარდ დოლარად იყო შეფასებული. გენადი ტიმჩენკო, რომელიც „ნოვატეკსა“ და „სიბურში“ წილებს ფლობს, მეცხრე ადგილზე იყო, მისი ქონება წლის განმავლობაში 1.51 მილიარდი დოლარით შემცირდა და 16.6 მილიარდ დოლარს მიაღწია.
BBI-ის რეიტინგში რუსი მილიარდერების ტოპ 10-ს ასრულებს Renova-ს მთავარი მფლობელი ვიქტორ ვექსელბერგი, რომლის ქონებაც 16,1 მილიარდ დოლარს შეადგენს, რაც წინა წელთან შედარებით 1,29 მილიარდი დოლარით მეტია.
კერიმოვის ქონება, რომელიც რუს მილიარდერებს შორის მე-15 ადგილზეა, წლის განმავლობაში 4.82 მილიარდი დოლარით გაიზარდა და 9.89 მილიარდ დოლარს მიაღწია.
