ანადირის აეროპორტში Mi-8 სამხედრო ვერტმფრენის ავარიული დაშვების შედეგად ოთხი ადამიანი, ყველა ბორტზე მყოფი, დაიღუპა, იტყობინება „რია ნოვოსტი“ ჩუკოტკის მთავრობაში წყაროზე დაყრდნობით.
„ვერტმფრენი სატესტო ფრენას ასრულებდა. ის 15 მეტრის სიმაღლიდან ჩამოვარდა. შიგნით ოთხი ადამიანი იმყოფებოდა და ყველა გარდაიცვალა“, - განაცხადა მთავრობის წარმომადგენელმა.
ავარიის შემდეგ ადგილზე ხანძარი გაჩნდა, თუმცა ის ჩააქრეს. წინასწარი ინფორმაციით, ხისტი დაშვების მიზეზი შესაძლოა ვერტმფრენის ტექნიკური გაუმართაობა გამხდარიყო.
TASS-ის ცნობით, ჩუკოტკის ანადირის რაიონის ხელმძღვანელმა სერგეი სავჩენკომ განაცხადა, რომ ინციდენტი „სარემონტო ტესტირების დროს“ მოხდა. მისივე თქმით, ვერტმფრენს დაშვების შემდეგ ცეცხლი გაუჩნდა.
