უკრაინის სამხედრო სარდლობა სერიოზულად ეკიდება რუსული მობილიზაციის მონაცემებს და 2023 წლის პირველ კვარტალში კიევზე ახალ შეტევას და სამხრეთიდან გარღვევის მცდელობას ელის. ამის შესახებ უკრაინის შეიარაღებული ძალების მთავარსარდალმა ვალერი ზალუჟნიმ The Economist-თან ინტერვიუში განაცხადა.
„რუსეთის მობილიზაციამ გაამართლა. სიმართლეს არ შეესაბამება, რომ მათი პრობლემები იმდენად სერიოზულია, რომ ეს ხალხი ბრძოლას არ აპირებს. ისინი იბრძოლებენ. მეფე ეუბნება მათ, იბრძოლონ და ისინიც იბრძოლებენ.“.
„მე შევისწავლე ჩეჩნეთის ორი ომის ისტორია - ის ერთი და იგივე იყო. შესაძლოა, ისინი ისე კარგად არ იყვნენ აღჭურვილნი, მაგრამ მაინც პრობლემას წარმოადგენენ ჩვენთვის. ჩვენი შეფასებით, მათ 1.2-1.5 მილიონი ადამიანისგან შემდგარი სარეზერვო ძალა ჰყავთ...“ - განაცხადა ზალუჟნიმ.
მისი თქმით, რუსეთი ახალი შეტევისთვის აგროვებს კაცსა და იარაღს, ხოლო უკრაინამ ახლა ყურადღება უნდა გაამახვილოს რესურსების დაგროვებაზე გაჭიანურებული და რთული ბრძოლებისთვის, რომლებიც შეიძლება მომავალ წელს დაიწყოს.
„ჩვენთვის მნიშვნელოვანი სტრატეგიული ამოცანაა რეზერვების შექმნა და ომისთვის მომზადება, რომელიც შეიძლება მოხდეს თებერვალში, საუკეთესო შემთხვევაში მარტში და უარეს შემთხვევაში იანვრის ბოლოს“, - თქვა მან.
რუსეთს შეუძლია მასშტაბური შეტევა დაიწყოს დონბასიდან აღმოსავლეთით, სამხრეთიდან ან თუნდაც ბელორუსიიდან. რუსული ჯარები შეეცდებიან უკრაინული ძალების უკან დახევას და შესაძლოა, კიევის აღების მეორე მცდელობაც კი განახორციელონ.
ზალუჟნიმ ასევე განაცხადა, რომ უკრაინის შეიარაღებულ ძალებს ამჟამად სამი ძირითადი ამოცანა აქვთ: არსებული საზღვრების შენარჩუნება, ომის შემდეგი ეტაპისთვის რეზერვების დაგროვება და არმიის საჰაერო თავდაცვისა და სარაკეტო თავდაცვის სისტემებით უზრუნველყოფა, კერძოდ, უკრაინის სამოქალაქო ინფრასტრუქტურის დასაცავად.
„ვფიქრობ, რომ ძალიან წვრილ ზღვარზე მივდივართ. თუ [ელექტროენერგიის ქსელი] განადგურდება... მაშინ ჯარისკაცების ცოლები და შვილები გაიყინებიან. წარმოგიდგენიათ, როგორი განწყობა ექნებათ ჯარისკაცებს მაშინ? წყლის, ელექტროენერგიისა და გათბობის გარეშე, შეგვიძლია საერთოდ ვისაუბროთ რეზერვების საბრძოლო ოპერაციების გასაგრძელებლად მომზადებაზე?“ - ამბობს მთავარსარდალი.
ამავდროულად, ზალუჟნი დარწმუნებულია, რომ უკრაინა შეძლებს ომის დაწყების შემდეგ რუსეთის მიერ ოკუპირებული ტერიტორიების დაბრუნებას. ამის მისაღწევად, მთავარსარდლის თქმით, უკრაინას დამატებით 300 ტანკი, 600-700 ქვეითი საბრძოლო მანქანა და 500 ჰაუბიცა სჭირდება.
უკრაინის შეიარაღებული ძალების მთავარსარდალმა აღნიშნა, რომ უკრაინას არსებული თავდაცვის სისტემებისთვის საბრძოლო მასალა ეწურება. ამერიკული „პატრიოტის“ ტიპის საჰაერო თავდაცვის სისტემები, რომელთა უკრაინაში ჩასვლაც მოსალოდნელია, უკრაინის შეიარაღებული ძალებისთვის უდიდეს სტიმულს მისცემს, თუმცა ჯარისკაცების მათ გამოყენებაში მომზადებას დრო დასჭირდება.
