უკრაინაში რუსეთის შეჭრის შედეგად, შვიდი ათასი კილომეტრი რკინიგზის ლიანდაგი დაზიანდა.
კვირას, კიევში, ვაგონების შეკეთების ქარხანაზე სარაკეტო დარტყმები განხორციელდა. რუსეთის თავდაცვის სამინისტროს განცხადებით, დარტყმის სამიზნე აღმოსავლეთ ევროპის ქვეყნების მიერ მოწოდებული T-72 ტანკები და ჯავშანტექნიკა იყო, რომლებიც ქარხნის შენობებში იყო განთავსებული.
სააქციო საზოგადოება „უკრაინის რკინიგზის“ ხელმძღვანელობა აცხადებს, რომ ქარხნის ტერიტორიაზე სამხედრო ტექნიკა არ არის.
„რუსეთი ცდილობს ჩვენი რკინიგზის ინფრასტრუქტურის განადგურებას და ვაგონების, განსაკუთრებით მარცვლეულის გადამზიდავი ვაგონების შეკეთება ამ ინფრასტრუქტურის ნაწილია. ასევე მნიშვნელოვანია ამის უფრო ფართო კონტექსტში გაგება, რადგან რუსულმა ჯარებმა არაერთხელ შეუტიეს ჩვენს ქვესადგურებს, რომლებიც აუცილებელია რკინიგზისთვის ელექტროენერგიის სტაბილური მიწოდებისთვის“, - აცხადებს სამეთვალყურეო საბჭოს თავმჯდომარის მოადგილე სერგეი ლეშჩენკო.
ინფრასტრუქტურის სამინისტროს მონაცემებით, ქვეყნის მასშტაბით 21 რკინიგზის სადგური და 49 რკინიგზის ხიდი განადგურდა. საერთო ჯამში, უკრაინის ეკონომიკამ 600 მილიარდი დოლარის ზარალი განიცადა.
