უკრაინელების 55% რუსი ოკუპანტების უკრაინის ტერიტორიიდან სრულ განდევნას გამარჯვებად მიიჩნევს, ხოლო კიდევ 20,5% რუსული არმიის სრულ განადგურებას და თავად რუსეთის დაშლაში დახმარებას.
„გამოკითხულთა უმრავლესობა (55%) ამბობს, რომ გამარჯვებად ჩაითვლება რუსული ჯარების მთელი უკრაინიდან განდევნა და საზღვრების აღდგენა 2014 წლის იანვრის მდგომარეობით. კიდევ 20,5% კიდევ უფრო რადიკალურია - მათთვის ომში გამარჯვება რუსული არმიის განადგურება და რუსეთში აჯანყების/დაშლის ხელშეწყობა იქნება“, - ნათქვამია Deminitiatives-ისა და Razumkov Center-ის მიერ 5-დან 12 აგვისტომდე ჩატარებული გამოკითხვის შედეგებში.
გამოკითხულთა მცირე ნაწილი ომის დასრულებას უკრაინის მხრიდან გარკვეული დათმობებით გამარჯვებად მიიჩნევს.
დაახლოებით 9% გამარჯვებად მიიჩნევს რუსული ჯარების გაძევებას მთელი უკრაინიდან, ოკუპირებული ყირიმის გარდა, 7,5% სტატუს კვოს აღდგენას 2022 წლის 23 თებერვლიდან, ხოლო 3% ომის დასრულებად მიიჩნევს, მაშინაც კი, თუ რუსული არმია სრულმასშტაბიანი შემოჭრის შედეგად დაკავებულ ტერიტორიებზე დარჩება.
ასევე, გამოკითხულთა 75%-ზე მეტი მხარს დაუჭერდა გადაწყვეტილებას, უკრაინის გამარჯვებისა და მისი ტერიტორიის დეოკუპაციის შემდეგ, რუსეთის ფედერაციასთან ყველანაირი ურთიერთობის სრულად გაწყვეტის შესახებ, მათ შორის რუსებისთვის უკრაინაში შესვლის სრული აკრძალვის შესახებ.
გამოკითხვა ილკო კუჩერივის სახელობის დემინიტივის ფონდმა და რაზუმკოვის ცენტრის სოციოლოგიურმა სამსახურმა 2022 წლის 5-დან 12 აგვისტომდე ჩაატარეს, ბრემენის უნივერსიტეტისა და საერთაშორისო რენესანსის ფონდის გრანტის მხარდაჭერით.
გამოკითხვა ჩატარდა 112 დასახლებულ პუნქტში (57 ქალაქის და 55 სოფლის) პირისპირ ინტერვიუს მეთოდით.
ზაპოროჟიეს, ნიკოლაევისა და ხარკოვის ოლქებში კვლევა მხოლოდ უკრაინის მთავრობის მიერ კონტროლირებად ტერიტორიებზე ჩატარდა, სადაც სამხედრო მოქმედებები არ მიმდინარეობს.
სულ გამოკითხული იქნა 18 წლის და უფროსი ასაკის 2,024 რესპონდენტი.
თეორიული შერჩევის შეცდომა არ აღემატება 2.3%-ს.
