უკრაინის შეიარაღებულმა ძალებმა ხარკოვის ოლქში კუპიანსკის ქალაქი გაათავისუფლეს, განაცხადა რეგიონული საბჭოს თავმჯდომარის მრჩეველმა ნატალია პოპოვამ. ინფორმაცია უკრაინის უსაფრთხოების სამსახურმა დაადასტურა.
პოპოვამ ქალაქის ადმინისტრაციის შენობის წინ უკრაინელ ჯარისკაცებთან ერთად გადაღებული ფოტო გამოაქვეყნა.
დღეს დილით, უკრაინის უსაფრთხოების სამსახურმა დაადასტურა კუპიანსკში სპეციალური დანიშნულების რაზმის შესვლა. ხარკოვის სამხედრო-სამოქალაქო ადმინისტრაციის წყარომ „უკრაინსკაია პრავდას“ დაუდასტურა ქალაქის განთავისუფლება. წინა ცნობებით, უკრაინულმა ძალებმა ქალაქის დასავლეთ ნაწილზე კონტროლი მოიპოვეს (აღმოსავლეთი ნაწილი, ქალაქის ერთი მესამედი, მდინარის გადაღმა მდებარეობს).
რუსული წყაროების ცნობით, ქალაქის აღმოსავლეთ ნაწილს კვლავ რუსული ძალები აკონტროლებენ, რომლებიც იქ თავდაცვითი პოზიციების დაკავებას აპირებენ.
კიევმა და უკრაინის შეიარაღებულმა ძალებმა კუპიანსკის გათავისუფლების შესახებ ოფიციალურად ჯერ არ გამოაცხადეს.
სოციალურ მედიაში ვრცელდება ცნობები და პოსტები იზიუმის განთავისუფლებისა და ლიმანისთვის ბრძოლის შესახებ. ოფიციალურ პირებს ეს ინფორმაცია ჯერ არ დაუდასტურებიათ
თვითგამოცხადებული „დპრ“-ის ინფორმაციის მინისტრის მოადგილემ, დანიილ ბეზსონოვმა განაცხადა, რომ რუსმა ჯარებმა ასევე დატოვეს იზიუმი, რომელიც კუპიანსკიდან სამხრეთ-დასავლეთით დაახლოებით 70 კილომეტრში მდებარეობს. ოფიციალური პირის თქმით, ჯარისკაცების უმეტესობამ ალყიდან თავის დაღწევა მოახერხა.
აშშ-ის ომის შესწავლის ინსტიტუტის მონაცემებით, უკრაინის შეიარაღებულმა ძალებმა 9 სექტემბრის მდგომარეობით, კონტრშეტევის დროს ხარკოვის რეგიონში დაახლოებით 2500 კვადრატული კილომეტრი დაიბრუნეს.
რაც შეეხება პროგნოზებს, ომის შესწავლის ამერიკული ინსტიტუტის ანალიტიკოსები მიიჩნევენ, რომ უკრაინის შეიარაღებულ ძალებს შეუძლიათ სამ დღეში აიღონ კუპიანსკი, რომლის მოსახლეობაც ომამდე თითქმის 28 000 ადამიანს შეადგენდა. ვიტალი განჩევმა, რომელიც საკუთარ თავს ხარკოვის ოლქის საოკუპაციო ადმინისტრაციის ხელმძღვანელად მიიჩნევს, ადგილობრივ მოსახლეობას ევაკუაციისკენ მოუწოდა.
