ჩინური კომპანია Hisense მზადაა რუსეთში საყოფაცხოვრებო ტექნიკის წარმოება დაიწყოს, განაცხადა სანქტ-პეტერბურგის ვიცე-გუბერნატორმა კირილ პოლიაკოვმა.
„ჩინური კორპორაცია წარმოების სანქტ-პეტერბურგში ლოკალიზებას გეგმავს. რუსი მომხმარებლები მას, ძირითადად, ტელევიზორებისა და კონდიცირების სისტემების ფართო ასორტიმენტით იცნობენ“, - დაწერა მან თავის Telegram არხზე.
„ჩვენ დაინტერესებულნი ვართ ეფექტური თანამშრომლობით და მზად ვართ, ჩვენს პარტნიორებს ყოვლისმომცველი დახმარება გავუწიოთ. მე მათ დავავალე, რომ კოლეგებთან კონსულტაციები გაიარონ ინდუსტრიული ინვესტორებისთვის არსებული დახმარების ზომების შესახებ და შეარჩიონ ჩვენს რეგიონში ბიზნესის განვითარების ოპტიმალური მექანიზმი“, - აღნიშნა პოლიაკოვმა.
Hisense-ის ტექნიკის ზუსტი ტიპები, რომელთა აწყობასაც ის რუსეთში გეგმავს, არ გახმაურებულა, თუმცა ასორტიმენტი ძალიან ფართოა - ტელევიზორებისა და კონდიციონერების გარდა, კომპანია ასევე აწარმოებს მაცივრებს, სარეცხ მანქანებს, ქურებს, ღუმელებს, ჭურჭლის სარეცხ მანქანებს, მტვერსასრუტებს და სხვა.