ევგენი პრიგოჟინის ჰოლდინგური კომპანიის „პატრიოტის“ კუთვნილი მედია საშუალებების დაფინანსება შეწყდება და პროექტები დაიხურება, იტყობინება „იზვესტია“ საკუთარ წყაროებზე დაყრდნობით.
ევგენი პრიგოჟინთან დაკავშირებულმა რამდენიმე გამოცემამ უკვე გამოაცხადა დახურვის შესახებ.
„ჩვენი ინფორმაციით, პრიგოჟინი მედიაჯგუფ „პატრიოტის“ მენეჯმენტს ვასილიევსკის კუნძულზე მდებარე მის შტაბ-ბინაში შეხვდა, სადაც მან დაფინანსების შეწყვეტისა და მედიაპროექტების დახურვის შესახებ განაცხადა“, - აღნიშნა „იზვესტიამ“ Telegram-ის არხზე.
სანქტ-პეტერბურგის გამოცემა „ნევსკიე ნოვოსტის“ რედაქციამ მკითხველს დაემშვიდობა.
RIA FAN-მა Telegram არხის განახლება 15:00 საათზე შეწყვიტა.
„როსკომნადზორის“ ვებსაიტებსა და ვებგვერდებზე წვდომის შეზღუდვების შემოწმების უნივერსალური სამსახურის ცნობით, რუსეთში შეიზღუდა „რია ფედერალური ახალი ამბების სააგენტოს“ ვებსაიტზე, ასევე „პოლიტიკა სეგოდნიას“, „ეკონომიკა სეგოდნიას“, „ნევსკიე ნოვოსტისა“ და „ნაროდნიე ნოვოსტის“ ვებსაიტზე წვდომა. მედიის ცნობით, ეს გამოცემები მედიაჰოლდინგ „პატრიოტის“ შემადგენლობაში შედიოდნენ. ყველა ამ გამოცემის ვებსაიტი ამჟამად მიუწვდომელია.
23 ივნისის საღამოს პრიგოჟინმა და მისმა „ვაგნერის“ ოპერატიულმა წევრებმა რუსეთში სამხედრო გადატრიალება სცადეს. 24 ივნისის დილით რუსეთის პრეზიდენტმა ვლადიმერ პუტინმა რუს ხალხს მიმართა და პირობა დადო, რომ ყველაფერს გააკეთებდა ქვეყნის დასაცავად.
მოგვიანებით გამოცხადდა, რომ პრიგოჟინის წინააღმდეგ საქმე შეწყდებოდა და ის ბელარუსში გაემგზავრებოდა. სანქტ-პეტერბურგში რამდენჯერმე იპოვეს ბიზნესმენთან დაკავშირებული დიდი რაოდენობით ფულით სავსე მიკროავტობუსები.
