რუსეთის იუსტიციის სამინისტრომ უცხოელი აგენტების რეესტრში ჯგუფ „პორნოფილმის“ წამყვანი ვოკალისტი ვლადიმერ კოტლიაროვი და კიდევ ხუთი პირი შეიყვანა. ეს ინფორმაცია სამინისტროს ვებსაიტზე 8 სექტემბერს გამოქვეყნდა.
„ვ. ა. კოტლიაროვი* ღიად გამოდიოდა უკრაინის მხარდასაჭერად. ის მონაწილეობდა უცხოელი აგენტების მიერ საზოგადოებისთვის განკუთვნილი შეტყობინებებისა და მასალების შექმნაში. ის ახორციელებდა ანტირუსული შეხედულებების გაღვივებისკენ მიმართულ საქმიანობას, მათ შორის რუსეთის ფედერაციის მოქალაქეების შესახებ ნეგატიური განცხადებების გაკეთებას“, - ნათქვამია იუსტიციის სამინისტროს განცხადებაში.
ასევე ნათქვამი იყო, რომ სოლისტმა „მხარი დაუჭირა რუსეთის ფედერაციის ტერიტორიაზე ტერორისტული საქმიანობის განმახორციელებელ პირებს“ და „გაავრცელა ცრუ ინფორმაცია რუსეთის ფედერაციის სახელმწიფო ორგანოების მიერ მიღებული გადაწყვეტილებებისა და მათ მიერ გატარებული პოლიტიკის შესახებ“.
კოტლიაროვის გარდა, უცხოელი აგენტის სტატუსი მიენიჭათ რუს ჟურნალისტს ანდრეი მალგინს, სოციოლოგ ნიკოლაი მიტროხინს, პოლიტიკოს ნატალია პელევინას, ეფრემოვიდან დეპუტატ ოლგა პოდოლსკაიას და კინორეჟისორსა და ჟურნალისტ მუმინ შაკიროვს.