24 აგვისტოს დილით, ლენინგრადის ოლქის უსტ-ლუგას პორტში, ნოვატეკის ტერმინალში ხანძარი გაჩნდა.
გუბერნატორმა ალექსანდრე დროზდენკომ განაცხადა, რომ ხანძარი რეგიონის თავზე ჩამოგდებული დრონების ნამსხვრევებმა გამოიწვია. „წინასწარი ინფორმაციით, მსხვერპლი არ არის და საწვავის ავზები ხანძარს არ დაუზიანებია“, - ხაზგასმით აღნიშნა მან.
თავდასხმების სერია სამარის რეგიონში გაგრძელდა. სიზრანის ხელისუფლებამ სამრეწველო ობიექტზე უკრაინული დრონის თავდასხმის შესახებ განაცხადა. გუბერნატორმა ვიაჩესლავ ფედორიშჩევმა არ დააკონკრეტა დაზიანებული კონკრეტული ობიექტი. თუმცა, Telegram-ის არხის, Astra-ს ცნობით, სამიზნე სიზრანის ნავთობგადამამუშავებელი ქარხანა იყო.
რუსეთის თავდაცვის სამინისტრომ განაცხადა, რომ მხოლოდ 23 აგვისტოს საღამოს, საჰაერო თავდაცვის სისტემებმა 57 დრონი გაანადგურეს, ხოლო 24-ის ღამეს კიდევ 95 ჩამოაგდეს. სამინისტროს ცნობით, დარტყმები განხორციელდა რამდენიმე რეგიონში: ბრიანსკი, ტვერი, კალუგა, სმოლენსკი, კურსკი, ლენინგრადი, ნოვგოროდი, ორიოლი, ტამბოვი, ბელგოროდი, როსტოვი და სამარა, ასევე მოსკოვის ოლქი, ჩუვაშია, თათრეთის რესპუბლიკა და ყირიმი. დრონები ასევე ჩამოაგდეს შავი ზღვის თავზე.
თავდასხმებმა ასევე იმოქმედა ქვეყნის სატრანსპორტო სისტემაზე. პენზას, სარატოვის, ნიჟნი ნოვგოროდის, კიროვის, კალუგისა და იჟევსკის აეროპორტები იძულებული გახდნენ შეეჩერებინათ ოპერაციები. სანქტ-პეტერბურგის პულკოვოს აეროპორტში 60-ზე მეტი რეისი გადაიდო, ხოლო 39 თვითმფრინავი ალტერნატიულ აეროდრომებზე გადამისამართდა. აეროპორტში შეზღუდვები თითქმის 24 საათის განმავლობაში მოქმედებდა.
უკრაინული დრონები რეგულარულად ესხმიან თავს რუსეთში ენერგეტიკის სექტორის ობიექტებს, მათ შორის ნავთობგადამამუშავებელ ქარხნებს. „ნოვატეკის“ ტერმინალი უსტ-ლუგაში უკვე გამხდარა ასეთი თავდასხმების სამიზნე. ასეთი დარტყმების შემდეგ, ობიექტები დროებით დაიხურა, რაც გარდაუვლად იწვევს ბენზინის ფასების ზრდას.