საფრანგეთის მთამსვლელობის ფედერაციის ვებსაიტზე გამოქვეყნებული განცხადების თანახმად, ახალგაზრდული მსოფლიო ჩემპიონი მთამსვლელობაში ლუსი დუადი დაცემის შედეგად გარდაიცვალა.
გავრცელებული ინფორმაციით, 16 წლის სპორტსმენი სამხრეთ-აღმოსავლეთ საფრანგეთში, საკუთარ სახლთან ახლოს მდებარე კლდეებს იკვლევდა, როდესაც ფეხი დაუცდა და 150 მეტრის სიმაღლიდან დაეცა.
ლუსი დუადი ტოკიოს ოლიმპიური თამაშების პროგრამაში შემავალი დისციპლინა ბოულდერინგში ახალგაზრდებს შორის მსოფლიო ჩემპიონია. გასულ წელს მან პირველად მიიღო მონაწილეობა ზრდასრულთა შეჯიბრებებში. აშშ-ს ქალაქ კოლორადოში გამართულ მსოფლიო თასის ეტაპზე დუადი მეხუთე ადგილზე გავიდა.
შეგახსენებთ, რომ იანვარში, ლოზანაში რუსი მოციგურავე კინაღამ დაიღუპა. ახალგაზრდული ოლიმპიური თამაშების გახსნის ცერემონიის რეპეტიციის დროს, ის ხუთი მეტრის სიმაღლიდან გადმოვარდა და მრავლობითი დაზიანებები მიიღო.
